शैक्षिक परामर्श व्यवसायीहरुको नयाँ संगठन, उपत्यका बिषेश कमिटी गठन
शैक्षिक परामर्श व्यवसायीहरुले व्यवसायीक हित प्रवद्र्धनका लगि नयाँ संगठन निर्माण गरेका छन् । राजनीतिक दल नेकपा एमाले निकट रहेर प्रगतिशिल शैक्षिक परामर्श व्यवसायी संघ पिक्यान गठन गरिएको हो । शैक्षिक परामर्श व्यवसायीहरुलाई गोलबद्ध गर्ने उदेश्य राखेर गठन गरिएको पिक्यानको राष्ट्रिय अधिवेशनको लागि ५१ सदस्यीय आयोजक कमिटी बनेको छ । जसमा संयोजक बिष्णु पोखरेल र सहसंयोजक राजन श्रेष्ठ रहेका छन् । पिक्यान गठनका लागि प्रारम्भिक रुपमा पोखरेल र श्रेष्ठसहित बुद्धिप्रसाद रेग्मी, वासु नेपाल, सुदन चौहान, बिकल्प पोखरेल र आरसी ओलीको विषेश भूमिका रहेको छ । पिक्यानलाई प्रभावकारी रुपमा व्यवसायीहरु माझ पुर्याउन उपत्यका बिषेश कमिटी गठन गरिएको छ । उपत्यका कमिटी, प्रदेश कमिटी हुँदै पिक्यानको राष्ट्रिय कमिटी बन्नेछ । पिक्यानले उपत्यका बिषेश कमिटीको कार्य समिति चयन गर्दै सातै प्रदेशमा संयोजक र सहसंयोजक तोकेको छ ।
व्यवसायीको हकहित प्रवद्र्धन र क्षमताको बिकास गराउने उदेश्यका साथ पिक्यान निर्माण गरिएको संयोजक पोखरेलले जानकारी दिए । पिक्यानको आफ्नो अलग्गै पहिचान र अस्तित्व हुने भन्दै पोखरेलले कोही कसैसँग प्रतिश्पर्धा नहुने बताए । उनले भने– ‘हामी कसैसँग प्रतिश्पर्धी गर्न आएका होइनौं, प्रगतिशिल शैक्षिक परामर्श व्यवसायी संघ ९पिक्यान०लाई नेकपा एमाले पार्टीको सशक्त जनबर्गिय संगठनको भूमिकामा स्थापित गराउने गरि कार्यक्रमहरु संचालन हुनेछन् । राजनीतिक दल निकट भएपनि समग्र शैक्षिक परामर्श व्यवसायीहरुको प्रतिनिधित्व गर्ने साझा प्लाटफर्मको रुपमा पिक्यान स्थापना भएको हो । त्यसै अनुरुप उपत्यका बिषेश कमिटीसमेत गठन गरिसकेका छौं ।’ उपत्यका कमिटी स्थापना भइसकेको बताउँदै संयोजक पोखरेलले सातै प्रदेशमा कमिटीहरु निर्माण गर्दै २ महिना भित्र सम्पूर्ण तयारी पुरा गरि राष्ट्रिय अधिबेशन गर्ने बताए ।
पिक्यानले राजधानीमा एक भव्य कार्यक्रम गरी दया थापाको अध्यक्षतामा ३७ सदस्यीय उपत्यका बिषेश कमिटी गठन गरेको छ । चैतन्य खरेल, दिपक खनाल, सुशीला भण्डारी, बलराम आचार्य, क्षितिज विष्ट उपाध्यक्ष भएका छन् भने सचिवमा कृष्ण राज भट्टराई चुनिएका छन् । त्यस्तै दिपक बास्तोला, गङ्गाराम बस्नेत, निराजन सिवाकोटी र रविन तिमल्सिनालाई सहसचिवको जिम्मेवारी दिइएको छ । कोषाध्यक्षमा राम थापा चयन भएका छन् ।
नयाँ कार्यसमितिलाई बधाई तथा शुभकामना दिंदै प्रमुख अतिथी रहेका ज्ञावलीले नेपालमा विविध कारणले विश्वस्तरिय र गौरव गर्न लायक शैक्षिक वातावरण बनि नसकेको अबसथामा व्यवसायीको भूमिका प्रशंसनीय भएको बताए । उनले नेपालमै गुणस्तरीय शिक्षाको अवसर सिर्जना गर्नुपर्नेमा जोड दिंदै सधैँ यो व्यवसाय वृद्धि हुनुमा नै गौरव गर्न नसकिने बताए । ज्ञवालीले भने– “मैले व्यवसायीका विविध समस्यालाई नजिकबाट नियालिरहेको छु, यसका साथै विद्यार्थीका समस्यालाई पनि बुझिरहेको छु, त्यसैले व्यवसायीले झेलिरहेका नीतिगत समस्यालाई समाधान गर्न पहल गर्ने मेरो र पार्टीको प्रयास रहनेछ ।” एकजना व्यवसायीले सिमित नाफाका लागि विद्यार्थीमाथि खेलबाड गर्दा देशको भविष्य मथिनै खेलबाड हुने हुँदा सचेत भएर काम गर्न उनले सुझाव दिए ।
त्यस्तै कार्यक्रमका विशेष अतिथि सांसद एल। पि। साँवा लिम्बूले नयाँ कार्यसमितिलाई शपथ ग्रहण गराउँदै व्यवसायीले सिर्जनात्मक क्षमता विस्तार गरी विद्यार्थीलाई वास्तविक चित्र देखाएर गुणस्तरीय सेवा दिन आग्रह गरे । पिक्यानका संस्थापक एवं फेकनका अध्यक्ष बासु नेपालले परामर्श व्यवसायी संघलाई कसले मोनिटरिङ गर्छ भन्ने टुङ्गो नहुँदा संविधान जारी भएपछि पनि समस्या जस्ताको तस्तै रहेको भन्दै यसलाई गम्भिरतापूर्वक लिन नेपाल सरकार र पार्टी प्रवक्ता ज्ञवालीको ध्यानाकर्षण गराए ।
पिक्यानका संस्थापक मध्येका एक सुदन चौहानले पार्टीको नेपाल राष्ट्रिय उद्योग व्यवसायी महासंघ अन्तर्गत स्थापित पिक्यानले व्यवसायीक हित प्रवद्र्धनका लागि सदस्यता विस्तार गर्दै लैजाने र व्यवसायीहरूको सक्रिय सहभागितालाई जोड दिएको बताए । उनले शैक्षिक परामर्श क्षेत्रको नीतिगत सुधारमा आइपर्ने समस्यालाई पार्टी हुँदै सरकारसम्म पुर्याउन पिक्यानले सशक्त भुमिका निर्वाह गर्ने बताए ।
