बाढीले काठमाडौँमा ३८२ घर डुबानमा
गएरातिदेखि परेको अविरल वर्षाका कारण काठमाडौँका ३८२ घर डुबानमा परेका छन् । त्यस्तै, प्रहरीले १३८ जनालाई उद्धार गरेको छ । काठमाडौँका खोलाका किनारका स्थान डुबानमा परेको हो । प्रहरीका अनुसार बल्खुको तरकारी बजार, कुलेश्वरको हाउजिङ क्षेत्र, कोटेश्वरको नरेफाँट क्षेत्र, बालाजुको नेपालटारको तल्लो क्षेत्र, शंखमुल पार्क, कालिमाटीको तरकारी बजार क्षेत्र डुबानमा परेका छन् । हालसम्म मानवीय क्षतिका बारे जानकारी नआएको प्रहरीले जनाएको छ ।
वागमती आसपासका सबै क्षेत्रहरुमा पानी पसेको छ । थापाथलीकै युएन पार्कमा पनि पानी पसेको छ । प्रहरीले वगमती आसपास कम उचाईका क्षेत्रमा बसेका सबै घरमा पानी पसेको जनाएको छ । विहानै जोखिममा परेका सयौंलाई प्रहरीले सुरक्षित स्थानमा सारिसकेको छ ।
बंगालको खाडीबाट आएको जलवस्पयुक्त हावा र हिजो बेलुकाबाट विकास भएको स्थानीय वायुको मिश्रित प्रभावका कारण काठमाडौं उपत्यका र आसपासका क्षेत्रमा भारी वर्षा भएको जल तथा मौसम पूर्वानुमान महाशाखाले जानकारी दिएको छ । पानी पर्ने क्रम भोलि दिउँसोसम्म रहनेछ ।
