जतिसुकै शक्तिशाली व्यक्तिलाई पनि कानुनी दायरामा ल्याउनेछु : अख्तियार प्रमुख राई
अख्तियार दुरुपयोग अनुसन्धान आयोगका नवनियुक्त प्रमुख आयुक्त प्रेमकुमार राईले अनियमितता गरेको प्रमाण पाएमा जतिसुकै शक्तिशाली व्यक्ति भए पनि कार्यवाहीको दायरामा ल्याइने बताएका छन् । राईले प्रचण्डप्रति संकेत गरेको बुझिएको छ ।
अख्तियार दुरुपयोग अनुसन्धान आयोगका नवनियुक्त प्रमुख आयुक्त प्रेमकुमार राईले अनियमिततामा संलग्न सबैलाई कारवाही गर्ने घोषणा गर्नुभएको छ । अख्तियारको ३० औं स्थापना दिवसका अवसरमा आयोजित कार्यक्रममा उहाले सरकारी, सार्वजनिक जमीन अतिक्रमण गर्ने जोकोहीलाई अनुसन्धान गरेर कारबाही गरिने घोषणा गर्नुभएको हो ।
पछिल्लो समय सार्वजनिक जग्गा हडप्ने क्रम बढिरहेको बेला अख्तियारले यस्ता विषयमा चासो दिएको हो । ‘सरकारी सार्वजनिक जमिन अतिक्रमण गर्ने, खोला(खोल्सा तथा पर्ति जमीन ओगट्ने कार्य सह्य हुने छैन,’ प्रमुख आयुक्त राईले भन्नुभयो, ‘सार्वजनिक पदाधिकारी वा उनीहरू जोडिएका जोसुकैलाई अनुसन्धान गर्ने र रोक्ने कार्य आयोगको प्राथमिकतमा रहने छ ।’
औषधिलगायतमा भएका भ्रष्टाचार सम्बन्धी थुप्रै उजुरी आयोगमा दर्ता भएको र त्यसलाई प्राथमिकता दिएर घुसखोरी र विचौलियालाई निगरानी गर्न विशेष टोली खटाइने उहाले जानकारी दिनुभयो । प्रमुख राईले विभिन्न सरकारी निकाय, विकासे निर्माण कार्यमा हुने अनियमिततामा पनि अख्तियारको कडा नजर रहने बताउनु भयो ।
