जसपाका नेता डा. शिवजी यादव नेकपा प्रवेश, राजेन्द्र महतो पनि आउने तयारीमा
जसपाका प्रभावशाली नेता डा शिवजी यादव नेपाल कम्युनिस्ट पार्टी (नेकप)मा प्रवेश गर्नुभएको छ । यादव मंगलबार राति प्रधानमन्त्री निवासमा प्रधानमन्त्री केपी शर्मा ओलीको हातबाट खादा ग्रहण गर्दै नेकपा प्रवेश गर्नुभएको हो । डा यादवलाइ नेकपामा स्वागत गर्ने क्रममा उपप्रधानमन्त्री इश्वर पोखरेल र पूर्वमन्त्री एवं युवा संघका इन्चार्ज महेश बस्नेत पनि सहभागी हुनुहुन्थ्यो । जसपाका नेता राजेन्द्र महतो सहित चार नेता पनि ओली नेतृत्वको नेकपामा आउने तयारी भैरहेको स्रोतको दाबी छ ।
विक्रम सम्बत २०३२ सालबाट राजनीतिमा सक्रिय डा यादव जसपको केन्द्रीय कमिटीमा हुनुहुन्थ्यो । कम्युनिष्ट पुष्ठभूमिबाट राजनीतिमा जमेका डा यादवले सिभिल इन्जिनियरिङमा विद्यावारिधि गर्नुभएको छ । यसअघि उहाँ संघीय फोरमको संसदीय दलमा प्रमुख सचेतक पनि हुनुहुन्थ्यो ।
केपी ओलीको बोलीको छुच्चो भए पनि देश र जनताका लागि काम गर्ने यस्तो नेता अर्को सय वर्ष नपाइने बताउने यादवले प्रधानमन्त्री ओलीको नियतमाथि कहिल्यै प्रश्न गर्नुभएन । उहाँले सबै नेपालीले गर्वले शिर उचो बनाउन सक्ने बनाइदिने ओली नेतृत्वको पार्टीमा समाहित हुन पाउँदा एकदमै खुशी लागेको बताउनुभएको छ । उहाँले मधेसका धेरै नेता नेकपा प्रवेशका लागि तयार रहेको जानकारी दिनुभएको छ ।
