विप्लवको पार्टीमा काण्डै-काण्ड, कमाण्ड नै गाएव
सरकारद्वारा प्रतिबन्धित विप्लव नेतृत्वको नेपाल कम्युनिस्ट पार्टीमा पनि पार्टी संगठनको एक महत्वपूर्ण संरचना खारेज भएको छ । जसले पार्टी पंक्तिमा हलचल उत्पन्न भएको छ । रोल्पामा सम्पन्न महाधिवेशनपछि विप्लव नेतृत्वको दलले कमाण्ड संरचना खडा गरेको थियो । देशलाई ४ भागमा विभाजन गरेर मध्य, पूर्वी, पश्चिम र सुदूरपश्चिम कमाण्ड स्थापना गरिएको थियो ।
उपत्यका र यस आसपासको क्षेत्र हेर्नेगरी खडा गरिएको मध्य कमाण्डको नेतृत्व सुरुमा हेमन्तप्रकाश वली ‘सुदर्शन’ ले गरेकोमा उनी पक्राउपछि खड्गबहादुर विश्वकर्मा ‘प्रकाण्ड’ को जिम्मा लगाइएको थियो । पूर्वीमा सन्तोष बुढामगर, मध्य पश्चिममा विप्लवका दाजु वीरजंग र सुदूरपश्चिम कमाण्डलाई धर्मेन्द्र बास्तोलाले नेतृत्व गर्दै आएका थिए । तर यी कमाण्ड संरचनालाई हालै सम्पन्न विप्लवको केन्द्रीय कमिटी बैठकले विघटन गरिदिएको विप्लवनिकट स्रोतले जनाएको छ ।
पार्टीलाई गति दिने उद्देश्यले विप्लवले कमाण्ड संरचना खडा गरेका थिए । यसको गठन पछाडिको उद्देश्य खासगरी, ब्युरो र जिल्लालाई गतिशील बनाउनु थियो । प्रारम्भमा कमाण्ड संरचनाले विप्लवको पार्टीलाई उद्देश्य अनुसार हिँडाएको बताइन्छ । तर पछिल्लो समय कमाण्ड संरचना त्यसबाट बिमुख भएर बिचलित भएको निष्कर्ष विप्लवलगायतको छ । स्रोतका अनुसार, सबैजसो कमाण्ड संरचनाप्रति विप्लव असन्तुष्ट थिएनन् । केहीले उद्देश्यअनुसार काम गरेको उनीलगायतको निष्कर्ष थियो । तर प्रकाण्डले नेतृत्व गरेको मध्यकमाण्डको काम–कारबाहीप्रति भने विप्लव र पार्टी पंक्ति तीव्र असन्तुष्ट थियो । मध्यकमाण्ड अर्थवादमा फसेपछि सिंगो कमाण्ड संरचना नै विघटन गर्ने निर्णय पार्टीले लिएको विप्लवका एक केन्द्रीय नेताले बताए । कमाण्ड संरचना विघटनपछि अब त्यसभन्दा मुनि रहेको ब्युरो कमिटीले स्वतन्त्र ढंगले काम गर्न पाउने भएको छ ।
मध्यकमाण्डका कुन नेताले कति हिनामिना गरे भन्ने विषयबारे भने विप्लवकाृ दलले गुपचुप राखेको छ । ‘पार्टीलाई बदनाम गर्दै आर्थिक हिनामिना गरेको भेटिएपछि विप्लव समूहको हालै सम्पन्न केन्द्रीय समिति बैठकले सबै कमाण्ड संरचना नै खारेज गरिदिएको छ,’ स्रोतले भन्यो, ‘तर यो कमाण्डले कति रकम हिनामिना ग¥यो भन्नेबारे भने गुपचुप राखिएको छ ।’ प्रकाण्डले नेतृत्व गरेको कमाण्डमाथि नै आर्थिक हिनामिनाको बात् लाग्नु र संरचना नै खारेजको घटना भएपछि मतान्तर उत्पन्न भएको छ । तर विप्लवका एक नेता केन्द्रीय कमिटीले नै कमाण्ड संरचना खारेजीको निर्णय गरेकाले यसको खासै प्रभाव नदेखिएको बताउँछन् ।
