हामीबाट ठुलो गल्ती भयाे : प्रचण्ड-माधव
नेकपाकाे प्रचण्ड समूहले विगतमा आफूहरूबाट गल्ती भएकाे बताएकाे छ । साे समूहका अध्यक्षद्वय पुष्पकमल दाहाल प्रचण्ड र माधवकुमार नेपालले विगतमा आफूहरूले पनि गल्ती गरेकाे उल्लेख गर्नुभएकाे हाे ।
साेमबार आम जनसमुदाय एवं कार्यकर्ता पङ्तीलाई सम्बोधन गरेर अध्यक्षद्धयले जारी गर्नुभएकाे अपीलमा आफूहरुबाट विगतमा गल्तीहरु भएका र अब आत्मालोचना गरेर अगाडि बढ्नुकाे विकल्प नरहेकाे उल्लेख छ ।
नेताहरूले विगतका गल्ती केलाएर र आत्मआलोचित भएर जनभावनाअनुरुप अगाडि बढ्नुपर्ने उल्लेख गर्दै अपीलमा लेखिएकाे छ – ‘राजनीतिक दलका नेताहरुले पनि विगतका हाम्रा गल्तीहरुलाई केलाउनु पर्ने र आत्मआलोचित भएर जनभावनाअनुरुप अगाडि बढ्नुपर्छ, यसप्रति हाम्रो गम्भीर ध्यान गएको छ, हामीबाट विगतमा भएका कतिपय गल्ती कमजोरीहरुप्रति सजग हुँदै भविष्यमा फेरि त्यस्ता कमी–कमजोरी नदोहोरिउन् भन्नेमा हामी सचेत छौं ।
लोकतन्त्रमा नागरिकहरुले दल र नेताहरुको आलोचना गर्नु स्वभाविक भएका उल्लेख गर्दै अपीलमा अहिले जनस्तरबाट आफूहरूकाे पनि आलोचना भइरहेको उल्लेख छ । अपीलमा लेखिएकाे छ – ‘यतिबेला नागरिक समाज र आम जनताबाट हाम्रो पनि केही आलोचना भइरहेको छ । लोकतन्त्रमा नागरिकहरुले दल र दलका नेताहरुको आलोचना गर्नु स्वभाविक मात्र हैन आवश्यक पनि हुन्छ, त्यस्तो आलोचना तथ्यमा आधारित, बस्तुनिष्ठ र सन्तुलित हुनुपर्छ र यस्तो आलोचनाको स्वागत गर्नुपर्छ ।’
पार्टीपंक्तिका लागि भनेर जारी गरिएकाे अपील प्रधानमन्त्री एवं नेकपा अध्यक्ष केपी शर्मा ओलीविरूद्ध केन्द्रित छ । प्रधानमन्त्रीले के ठिक र बेठिक छुट्टयाउन नसेको, प्रतिनिधि सभालाई अचेत बनाएको र न्यायालयलाई धम्क्याएको गम्भीर आराेप प्रचण्ड-माधवले लगाउनुभएकाे छ ।
प्रधानमन्त्रीमाथि प्रहार गर्नुभएका प्रचण्ड-माधवले राष्ट्रपति विद्यादेवी भण्डारीलाई समेत छाेड्नुभएकाे छैन । प्रधानमन्त्रीले संविधानको घाँटी निमोठ्दै प्रतिनिधि सभा विघटन गर्नुभएकाे र राष्ट्रपति विद्यादेवी भण्डारीले सोच विचारै नगरी प्रधानमन्त्रीको लहलहैमा लागेर असंवैधानिक सिफारिसलाई सदर गर्नुभएकाे उहाँहरूकाे आराेप छ ।
सबै कुरालाई थाती राखेर प्रतिनिधि सभा विघटन विरुद्धको आन्दोलनमा सामेल हुन प्रचण्ड-माधवले सबैसँग अपील गर्नुभएकाे छ । विघटन गर्ने असंवैधानिक कदमविरुद्ध जाग्न र संविधानको रक्षा गर्न सडक संघर्षमा लाग्न उहाँहरूकाे अपील छ ।
