३ बर्षदेखि विप्लव बेपत्ता, नेपालमै रहेको प्रहरीको दाबी

हाम्रो इकोनोमि

 

 

सरकारले २०७५ फागुनमा प्रतिबन्ध लगाएपछि नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ र उनको पार्टीविरुद्ध प्रहरी सक्रिय छ । प्रहरीले सो पार्टीलाई नेता–कार्यकर्तालाई जहाँ देख्यो, त्यहीँ समात्ने नीति लिएको छ । पछिल्लो समय हिसांत्मक बाटोतर्फ अगाडि बढिरहेको विप्लव समूहविरुद्ध प्रहरी पनि आक्रामक देखिएको छ । हालसम्म प्रहरीले सो समूहका शीर्ष चार नेतामध्येका हेमन्तप्रकाश ओली र धर्मेन्द्र बास्तोललाई पक्राउ गरिसकेको छ ।

त्यसबाहेक दर्जनौँ केन्द्रीय सदस्यहरु पक्राउ परिसकेका छन् । प्रहरी प्रधान कार्यालयका अनुसार प्रतिबन्धपछि सो समूहका २ हजार ३६ नेता–कार्यकर्तालाई पक्राउ गरिएको छ । जसमध्ये १७ सय ९१ जना छुटिसकेका छन् भने १३४ जना पुर्पक्षका लागि कारागार चलान भएका छन् । पछिल्लो समय दैनिकजसो सो समूहका नेता–कार्यकर्ता पक्राउ पर्ने क्रम जारी छ ।

आन्तरिक सुरक्षा चुनौती बढाउँदै लगेको विप्लव समूहविरुद्ध चारओटै सुरक्षा निकाय सक्रिय छन् । कतिपय स्थानमा नेपाल प्रहरी र सशस्त्र प्रहरी बलले सयुक्त सर्च अपरेसनसमेत चलाउँदै आएका छन् । केही स्थानमा सुरक्षाकर्मी र विप्लव समूहबीच दोहोरो फायरिङसमेत भएको छ । सुरक्षा निकायले विप्लव समूह हिसांत्मक र भौतिक कारबाहीतर्फ अगाडि बढेको निष्कर्ष निकालेका छन् । पछिल्लो समय मोरङका एक शिक्षकको विप्लव समूहले हत्या गरेपछि सुरक्षा निकायसमेत झस्किएका हुन ।

‘मोस्ट सर्चिङ’ सूचीमा विप्लव
प्रहरीले सयौँ  नेता–कार्यकर्तालाई पक्राउ गरिसकेको भए पनि सो समूहका नेतृत्वकर्ता विप्लललाई भने भेटाउन सकेको छैन । विप्लव प्रहरीको ‘मोस्ट सर्चिङ’ सूचीमा  छन् । उनको खोजीका र उनीविरुद्धका सूचना संकलनका लागि चारओटै सुरक्षा निकायको ‘इन्टेलिजेन्स’ टोली सक्रिय छ । तर पनि विप्लवविरुद्धको सुराक पछिल्लो ३ वर्षयता भेट्टउन सकेका छैनन् । तर, विप्लव नेपालमै रहेको सुरक्षा निकायहरुको दाबी छ । पूर्वमाओवादी लडाकुको सुरक्षामा विप्लव रहेको र उनी कुनै विकट क्षेत्रमा रहेको हुनसक्ने सुरक्षा अधिकारीको अनुमान छ । विप्लव समूहकै नेताहरुका भनाइलाई आधार मान्ने हो भने सोही पार्टीका सबै उच्च नेतालाई पनि विप्लवको सेल्टरबारे जानकारी छैन् । निकै सीमित नेताहरुको मात्रै विप्लवसँग पहुँच छ । त्यो पनि विप्लवले चाहेमा मात्रै भेट सम्भव हुने गरेको एक केन्द्रीय सदस्य बताउँछन् ।

चन्दा आतंक, विस्फोट, अपहरणलगायतका गतिविधि बढाउँदै लगेको सो समूहका नेता विप्लव आफूहरुको सर्वाधिक खोजीमा रहेको प्रहरी प्रवक्ता एसएसपी वसन्तबहादुर कुवँर बताउँछन् । प्रवक्ता कुवँर भन्छन्, ‘‘विप्लवको खोजीमा हामी सक्रिय छौँ । देशभर उनीविरुद्ध मुद्दा छन् । हाम्रो सर्वाधिक खोजीमा रहेको उनीबारेका सूचना नागरिकले पनि गोप्य रुपमा हामीलाई दिन सक्छन् ।”

पछिल्लो तीन वर्षयता विप्लव सार्वजनिक कार्यक्रममा देखिएका छैनन् । उनी पार्टीको सचिवालय बैठकमा मात्रै उपस्थित हुन्छन् । सचिवालयमा विप्लवसँगै खड्गबहादुर विश्वकर्मा, हेमन्तप्रकाश ओली र धर्मेन्द्र बास्तोला छन् । ओली र बास्तोला पक्राउ परेपछि अब २ जना मात्रै छन् । यस्तोमा विप्लव समूहले आफ्नो सचिवालय विस्तार गर्ने वा विघटनसमेत गर्नसक्ने सम्भावना रहेको सोही समूहका नेताहरु बताउँछन् ।

एक प्रहरी अधिकारीका अनुसार बेलाबेला विप्लवबारे सूचना आउने गरेका छन् । तर, प्रहरी टोली त्यहाँ पठाउँदा उनी भेटिदैनन् । विप्लव पक्राउ गर्न सके सो समूह छिन्नभिन्न हुने र समूहको अस्तित्व नै समाप्त हुने सुरक्षा निकायको अनुमान छ ।

उनले बेलाबेला आफ्नो सेल्टर परिवर्तन गर्ने गरेको सूचना प्रहरीसँग छ ।  खासगरी पश्चिम नेपालका पहाडी जिल्लामा उनी बस्ने गरेको प्रहरी अधिकारी दाबी गर्छन् । एक उच्च प्रहरी अधिकारीका अनुसार विप्लवले मोबाइल इन्टरनेट प्रयोग गर्दैनन् । उनलाई सम्पर्क गर्ने छुट्टै माध्यम छ । इन्टरनेट र मोबाइल प्रयोग नगर्ने भएकाले लोकेसन पत्ता लगाउन सकिँदैन ।