जनताको चाहना राजतन्त्र नै हो : पुर्वराजा ज्ञानेन्द्र शाह
पूर्व श्री ५ ज्ञानेन्द्र शाहले नेपाल सबै जातीय, भाषिक र सांस्कृतिक सम्प्रदायको साझा प्रयासको उपज देश भएको बताउनुभएको छ । २९९औँ पृथ्वीजयन्ती तथा राष्ट्रिय एकता दिवसको उपलक्ष्यमा एक सन्देश जारी गर्दै उहाँले संसारमा कतिपय देश जाति, भाषा र धर्मका नाममा परस्पर मतभेदबाट उत्पत्ति भए पनि नेपाल सबैको साझा प्रयासको उपज रहेको विश्वकै एक मात्र मुलुक रहेको र सोही कारण आज पनि राष्ट्रनिर्माताबाट मार्गदर्शनका निम्ति प्रदान गरिएको दिब्य उपदेश नेपालको अस्तित्व रक्षा, नेपालीको एकता र मूलूकको समृद्धि लक्षित भएको सबैले महसुस गरिरहेका उल्लेख गर्नुभएको छ ।
पूर्व श्री ५ ले आफ्नो सन्देशमा भन्नुभएको छ- ‘नेपाली भनेका नेपाली नै हुन् । कुनै अर्को जलप लगाएर हैन भन्ने अपार राष्ट्रभक्तिले ओतप्रोत भएर बडामहाराजधिराजबाट नेपाल राष्ट्र निर्माणमा आफ्नो पूरै जीवन समर्पण गरिबक्सेको तथ्य स्मरण मात्र हुँदा पनि हामी गौरवान्वित हुने गर्दछौँ । त्यो समय केवल आफ्नो परिकल्पनामा सीमित देशलाई आकारमा ल्याउन सानो चातुर्य, साहस र वीरताबाट मात्र सम्भव थिएन । दैविक आशीर्वाद, अदम्य साहस, पौरख र कूटनीतिक कौशलको अद्वितीय क्षमताबाट मात्र देवभूमि नेपालको स्थापना भएको हो ।’
यो समयमा हामी देश कसरी जोगाउन सकिएला भन्ने चिन्ताग्रस्त अवस्थामा छौँ भन्दै पूर्व श्री ५ ले राष्ट्रिय एकता, राष्ट्रियता, राष्ट्रिय स्वाभिमान र जनताको जनचाहनालाई राजसंस्थाले जहिल्यै उच्च प्राथमिकता दिएको उल्लेख गर्दै त्यसैअनुसार शाहवंशीय परम्परा अगाडि बढेको स्मरण गर्नुभएको छ ।
विज्ञप्तिमा अगाडि भनिएको छ- ‘राष्ट्रियता, राष्ट्रिय एकता, राष्ट्रिय स्वाभिमान र राष्ट्रिय हितलाई केन्द्रमा राखेर अघि बढ्ने क्रममा देशको आवश्यकता र जनताको चाहना हुँदा शाहवंशीय राजाहरूले सक्रिय भूमिका मात्र निर्वाह गरेका छैनन्, संवैधानिक राजतन्त्रको मर्यादा अनुरुपको व्यवहार भएको छ र राजगद्दी त्याग्नेसम्मको उच्च साहस र इमानदारी पनि दर्शाएका छन् ।’
‘हाम्रो विचारमा राजनीति भन्नु नै देश सेवाको उच्चतम साधन हो, तर हामीले व्यहोरेको राजनीति कति इमान्दार र राष्ट्रकेन्द्रित छ, कति जनहित अनुकुल छ त्यसको समीक्षा हुन अब विलम्ब भैसकेको छ । परिवर्तनका नाममा आफ्नो इतिहास, सभ्यता, धर्म, संस्कृति र एकता भत्काउँदै पराया इच्छा पूरा गर्ने अवान्छित क्रियाकलाप यहाँ भित्रिएको महसुस आमनेपालीले गर्नुपरेको छ ।’ सन्देशको अन्त्यमा भनिएको छ- ‘राष्ट्रिय अखण्डताका निम्ति हामीले एकताको गाँठो बलियो पार्नुपर्दछ । यसको औचित्य हिजो थियो, आज छ र भविष्यमा पनि रहने छ । यसैमा पृथ्वीजयन्तीको सार्थकता रहन्छ भन्ने हाम्रो मान्यता हो ।’
