धुम्बाराहीमा छिर्न पाएन दाहाल–नेपाल समूह
पुष्पकमल दाहाल ‘प्रचण्ड’ र माधवकुमार नेपाल नेतृत्वको नेपाल कम्युनिस्ट पार्ट (नेकपा)ले धुम्बाराहीस्थित पार्टी कार्यालयमा दाबी छाडेको संकेत गरेका छन् । दाहाल–नेपाल समूहले कोटेश्वर, पेरिसडाँडास्थित पूर्वमाओवादीको कार्यालयमा बैठक, भेलाहरू गर्न थालेपछि उनीहरूकै नेता कार्यकर्ताले समेत धुम्बाराहीमा दाबी नगर्ने मनस्थितिमा पुगेको चर्चा हुन थालेको छ । नेकपाको सबै डकुमेन्टहरू धुम्बाराहीस्थित पार्टी कार्यालयमा छन् ।
आइतबार दाहाल–नेपाल समूहको स्थायी समितिको बैठक पनि कोटेश्वरमै बसेको थियो । पार्टी विभाजन भएपछि दाहाल–नेपाल समूहको बैठक कोटेश्वरमै बसेका छन् । भेला, बैठक र प्रशिक्षणहरू पनि कोटेश्वरमै हुने गरेको छ । प्रधानमन्त्री केपी ओली नेतृत्वको नेकपाले धुम्बाराही कब्जा गरेपछि दाहाल–नेपाल समूहले धुम्बाराहीमा नजर लगाउन नसकेको हो । ओली समूहले दाहाल–नेपाल समूहलाई धुम्बाराहीस्थित पार्टीको केन्द्रीय कार्यालय र बल्खुमा बन्दै गरेको केन्द्रीय कार्यालयमा नजर नलगाउन चेतावनी दिएको छ ।
ओली समूहका नेता कृष्णगोपाल श्रेष्ठले सार्वजनिक रुपमा बल्खु र धुम्बाराहीको पार्टी कार्यालयमा नजर नलगाउन दाहाल–नेपाल समूहलाई चेतावनी दिइसकेका छन् । उनले नेकपाको आधिकारिक पक्ष ओली समूह भएको दाबी गर्दै आएका छन् ।दाहाल–नेपाल समूह तत्काल पार्टी कार्यालय कब्जा गर्ने पक्षमा देखिएको छैन । दाहाल–नेपाल समूह ओली समूहको डरले थरुरु भएर धुम्बाराहीमा बैठक राख्न नसेकेको चर्चा नेकपाकै नेता कार्यकर्ताहरूले चर्चा गर्न थालेका छन् ।
