पेट्रोलियम पाइपलाइनबाट दश महिनामै साढे एक अर्ब बचत

 

प्रधानमन्त्री केपी शर्मा ओलीको बिशेष पहलमा निर्माण भइ सञ्चालनमा आएको मोतिहारी–अमलेखगञ्ज पेट्रोलियम पाइपलाइनबाट नेपालको साढे एक अर्ब रुपैया बचत गरेको छ । प्रधानमन्त्री केपी शर्मा ओली र भारतीय समकक्षी नरेन्द्र मोदीले संयुक्त रुपमा उदघाटनपछि सञ्चालनमा ल्याइएको पेट्रोलियम पाइपलाइनबाट नेपाल आयल निगमले डेढ अर्व बचत गरेको हो ।

निगमले सार्वजनिक गरेको गत आर्थिक वर्ष २०७६/७७ को वार्षिक आर्थिक प्रतिवेदनअनुसार २०७६ भदौदेखि २०७७ असारसम्मको १० महिनामा ढुवानीबापतको एक अर्ब ४७ करोड रुपैयाँ बचत भएको छ । उक्त प्रतिवेदनअनुसार प्रतिमहिना पाइपलाइनमार्फत इन्धन ढुवानी हुँदा १४ करोड ७० लाख बचत हुँदै आएको छ । गत वर्षको भदौ २४ गतेबाट मोतिहारी–अमलेखगञ्ज पेट्रोलियम पाइपलाइन सञ्चालनमा आएको थियो ।

प्रधानमन्त्री ओलीले बिशेष चासो लिएकै कारण ३० महिनामा सम्पन्न हुने लक्ष्य रहेकोमा १५ महिनामै पाइपलाइनको काम सकिएको थियो । प्रधानमन्त्री ओलीले दोस्रो पटक सत्ता सम्हालेपछि सुरु भएको यो परियोजनाले नेपाललाई आर्थिक रुपमा ठुलै फाइदा हुने परिणामबाटै प्रष्ट देखिएको छ ।

इन्डियन आयल कर्पोरेसन (आईओसी) बाट ट्याङ्करमार्फत इन्धन ढुवानी गर्दै आएको निगमले गत वर्षबाट पाइपलाइनमार्फत डिजेल ढुवानी शुरु गरेका थियो । पाइपलाइनमार्फत डिजेल ढुवानी गर्न थालेपछि ठूलो रकम बचत हुन थालेको निगमका कार्यकारी निर्देशक सुरेन्द्र पौडेलले हाम्रो इकोनोमीलाई  जानकारी दिनुभयो । पौडेलका अनुसार अन्तर्राष्ट्रिय बजारमा पछिल्ला वर्ष इन्धनको मूल्य घट्नु र निगमले स्वचालित मूल्य प्रणाली लागू गर्दै गएपछि नाफामा पनि वृद्धि भएको छ ।

इन्धनको ढुवानी रकम बचत हुनुका साथै अघिल्लो वर्षको नाफा रकमको ब्याजबाट समेत नाफा बढाउन सहयोग पुगेको प्रतिवेदनमा उल्लेख छ । पाइपलाइन सञ्चालनको शुरुआती दिनमा कम मात्रामा डिजेल आयात भएकामा हाल उल्लेख्य मात्रामा आयात भएको निगमले जनाएको छ ।

नाफा पनि ह्वात्तै बढ्यो

लामो समयदेखि घाटामा रहेको निगमले पछिल्लो बर्ष ह्वात्तै नाफा बढाएको छ । चुस्त ब्यवस्थापन र पाइपलाइनका कारण निगमले नाफा बढाएको हो । निगमका अनुसार आर्थिक वर्ष २०७२-०७३ देखि (पाँच वर्ष यता) नाफामा सञ्चालन भइरहेको छ । निगमले आव २०७२/०७३ मा १९ अर्ब ३६ करोड, आव २०७३/०७४ मा नौ अर्ब ४५ करोड, २०७४/०७५ मा तीन अर्ब ५८ करोड, २०७५/०७६ मा आठ अर्ब ७५ करोड र गत आव २०७६/०७७ मा १२ अर्ब ८७ करोड रुपैयाँ नाफा कमाएको हो ।

निगमले आर्थिक वर्ष २०७५/७६ मा २९ करोड रहेको चुक्ता पूँजीलाई दश अर्ब पूँजी वृद्धि गरेर एघार अर्ब रुपैयाँ पुर्याएको थियो । आर्थिक वर्ष २०७५/७६ मा निगमले नाफा रकमबाट २० प्रतिशत लाभांश वितरण गरेको थियो । आर्थिक वर्ष २०७६/७७ मा नाफा रकमबाट शेयर होल्डरलाई २० प्रतिशत लाभांश वितरण गर्ने तयारी निगमले अघि बढाएको छ ।