चितवन घटनाबारे सूर्य थापाको प्रश्न– पार्टी एकताको नारा कसरी भयो सुनियोजित दुर्व्यवहार ?
शनिबार नेपाल कम्युनिष्ट पार्टी (नेकपा) का स्थायी कमिटी सदस्य एवं पूर्वअर्थमन्त्री सुरेन्द्र पाण्डेमाथि कार्यकर्ताबाटै भएको दुर्व्यवहारपछि जिम्मेवार नेताहरुबाट भइरहेको टीकाटिप्पणीप्रति प्रधानमन्त्रीका प्रेस सल्लाहकार सूर्य थापाले असन्तुष्टि व्यक्त गरेका छन् ।
खासगरी थापाले पार्टी प्रवक्ता नारायणकाजी श्रेष्ठले दिएको वक्तव्यप्रति प्रधानमन्त्री केपी शर्मा ओलीका प्रेस सल्लाहकार थापाले असन्तुष्टि जनाएका हुन् ।
शनिबार राप्ति नगरपालिकामा नेकपाको कार्यक्रममा पाण्डे बोलिरहँदा कार्यकर्ताले ‘पार्टी एकता, जबज र प्रधानमन्त्री ओलीको समर्थनमा’ नारावाजी गरेका थिए । उक्त घटना सुनियोजित भएको भन्दै नेकपा नेता झलनाथ खनाल, माधवकुमार नेपाल र प्रवक्ता नारायणकाजी श्रेष्ठले विज्ञप्ति र सामाजिक सञ्जालहरुमार्फत विरोध गर्दै घटनाको छानविन गर्न माग गरेका थिए ।
त्यसपछि सल्लाहकार थापाले ट्विट गर्दै लेखेका छन्– ‘बुटवलमा मुख्यमन्त्री शंकर पोखरेलले चढ्नुभएको गाडीमाथि ढुंगाप्रहार गरिंदा निदाउनुभएको थियो क्यारे ! चितवनमा पार्टी एकता जिन्दावादको नारा लगाउँदा सुनियोजित दुर्व्यवहार देख्नुभएछ– गज्जब छ गुटगत अन्तर्दृष्टि र छनोटपूर्ण वक्तव्यबाजी ! दुबै स्थायी कमिटी सदस्य– तब न नारायणकाजी !’
उनले नारायणकाजी श्रेष्ठको ट्विटलाई मेन्सन गरेर उक्त धारणा सार्वजनिक गरेका हुन् ।
त्यसअघि प्रवक्ता श्रेष्ठले ट्विटरमा लेको थिए– ‘आज चितवन जिल्लाको राप्ती नगरपालिकाको पार्टी कार्यक्रममा स्थायी कमिटीका सदस्य एवं सांसद कमरेड सुरेन्द्र पाण्डेमाथि भएको सुनियोजित दुर्व्यवहारको घटना अति निन्दनीय एवं भर्त्सनायोग्य छ । यसप्रकारको व्यवहार प्रोत्साहित गरेर कम्युनिस्ट आन्दोलनको मात्र होइन, कसैको पनि हित गर्दैन । चेत होस् ।’
