प्रधानमन्त्रीलाई कारबाही गर्ने तयारीमा प्रचण्ड
प्रधानमन्त्री केपी शर्मा ओलीलाई ‘कारवाही’ गर्ने निष्कर्षमा प्रचण्डको टोली पुगेको छ । पार्टी सचिवालयको बैठक बोलाउन प्रधानमन्त्रीलाई दिएको ‘अल्टिमेटम’ मङ्गलबार (कात्तिक २५ गते) सकिएको छ । केही दिनअघि प्रचण्डपक्षीय पाँच जना सचिवालयका सदस्यहरूको बैठक बसी ओलीलाई अल्टिमेटमसहितको पत्र दिने निर्णय भएबमोजिम प्रधानमन्त्री निवास बालुवाटारमै पुगेर पत्र बुझाइएको थियो । तर प्रधानमन्त्रीले उक्त पत्रको राम्रो ‘रेस्पोन्स’ नगरेको प्रचण्ड पक्षको ठहर छ ।
प्रचण्ड अध्यक्ष ओलीलाई पार्टीबाट अनुशासनको कारबाही गरी निष्काशनसम्म गर्ने मानसिकतामा भएको बुझिएको छ । त्यस्तै संसदीय दलको नेताबाट हटाउने योजना अनुरुपको तयारी पनि प्रचण्डबाट भइरहेको छ । प्राप्त जानकारीअनुसार प्रधानमन्त्री केपी शर्मा ओली यतिबेला प्रचण्डद्वारा चालिने कदमको प्रतीक्षा गरिरहनुभएको छ । प्रचण्डको कदम हेरेर मात्र प्रतिरोध गर्ने सोचमा प्रधानमन्त्री रहनुभएको छ ।
भनिन्छ, माधवकुमार नेपाल र बामदेव गौतम पार्टी विभाजन हुने गरी कुनै कदम चाल्ने पक्षमा हुनुहुन्न, उहाँहरूको उद्देश्य केपीलाई तह लगाएर सहमतिमा ल्याउनेसम्ममा मात्र सीमित छ । तर प्रचण्डले भने अब ओलीसँग सहयात्रा गर्न नसकिने ठहर गरिसक्नुभएको छ । पार्टी विभाजन हुने भयकै कारण अब चुपचाप सहेर बस्न नसकिने प्रचण्डको बुझाइ छ । त्यसैले उहाँ केपीविरुद्ध हदैसम्म निर्मम भएर जाने तयारी गर्दै हुनुहुन्छ ।
प्रचण्डले पार्टीभित्रका असन्तुष्ट नेताहरूलाई पनि आफूकहाँ बोलाएर ‘कित्ता स्पष्ट गर्न’ सुझाव दिनुभएको छ । आफूले केपीविरुद्ध कठोर र निर्णायक कदम चाल्न लागेको जानकारी गराउँदै ‘एक/दुई दिनभित्र कतापट्टि लाग्ने हो लाग्नु’ भन्ने उर्दी प्रचण्डबाट जारी भएपछि असन्तुष्ट पक्ष आन्तरिक परामर्शमा रहेको बुझिएको छ । ज्ञातव्य छ, प्रचण्डसँग टोपबहादुर रायमाझी, मणि थापा, हरिबोल गजुरेल, प्रभु साह र लेखराज भट्टलाई असन्तुष्ट नेताका रूपमा लिइन्छ भने रामबहादुर थापा ‘बादल’ र जनार्दन शर्मा ‘प्रभाकर’चाहिँ ‘दुई डुङ्गामा खुट्टा’ राख्ने नेता मानिनुहुन्छ ।
प्रचण्ड जोडिएको पार्टी यसअघि पनि आधि दर्जन पटक विभाजन भइसकेको छ । यसपटक उहाँले केपीलाई कसरी कारबाही गराउनुहुने हो र कसरी पार्टी विभाजन गराउनुहुने हो– प्रतीक्षाको विषय बनेको छ ।
