नेपाल गुटलाई थप ४ मन्त्री, प्रचण्ड अल्पमतमा
माधवकुमार नेपाल गुटलाई थप ४ मन्त्री दिएर भएपनि प्रधानमन्त्री केपी शर्मा ओलीले पार्टी एकता कायम राख्ने भएका छन । अब बन्ने नयाँ समिकरणमा प्रचण्ड भने अल्पमतमा परेका छन । उनि अहिलेको यो खेलमा रिड आउट भएका छन ।
प्रधानमन्त्री केपी शर्मा ओलीले पार्टीभित्र देखिएको विवादको हल खोज्न नेता माधवकुमार नेपालसहितका चार नेतालाई बालुवाटार बोलाएका छन् । प्रधानमन्त्री निवास बालुवाटारमा नेताहरु नेपाल, भीम रावल, सुरेन्द्र पाण्डे र रघुजी पन्तलाई बोलाएका हुन् । अर्का अध्यक्ष पुष्पकमल दाहालसँग विवाद बढेपछि ओलीले आन्तरिक छलफललाई तिव्रता दिएका छन् ।
उनले आफूपक्षमा रहेका नेताहरुको अनौपचारिक भेला पनि गरिरहेका छन्, जुन आज काठमाडौंमा समेत भएको छ ।
नेता नेपाललाई यसअघि पनि ओलीले कात्तिक ४ र ११ गते बालुवाटारमा बोलाएर निकासका लागि पहल गरेका थिए । पार्टीमा अब नेतृत्व लिनेगरी अघि बढ्न पनि नेपाललाई ओलीले आग्रह गर्दै आएका छन् भने सार्वजनिकरुपमा अब नेतृत्व दोस्रो पुस्तालाई हस्तान्तरण गर्नुपर्ने बताउँदै आएका छन् ।
