हारेपछि ट्रम्पले भने- धाँधली भयो
अमेरिकी राष्ट्रपति डोनाल्ड ट्रम्पले मतगणनाबारे प्रश्न उठाएका छन् । उनले दशौं लाख अमेरिकीहरुले आफूलाई भोट गरेको भन्दै केही समूहले उनीहरुको भावनामाथि खेल्न खोजेको आरोप लगाएका हुन् ।
‘दशौं लाख र दशौं लाखले हामीलाई भोट गरेका छन् ,’ ह्वाइटहाउसका प्रतिक्रिया दिँदै ट्रम्पले भने,‘एउटा अति नै दुःखी व्यक्तिहरुको समूहले ती व्यक्तिहरुलाई आफ्नो अधिकारबाट वन्चित गर्न खोजेको छ ।’ उनले तत्कालै मतगणना बन्द होस् भन्ने आफ्नो चाहना व्यक्त गरेका छन् ।
ट्रम्पले आफ्नो अग्रता रहेका राज्यहरुमा तत्कालै आफूलाई विजयी घोषणा गरिनुपर्ने संकेत गरेका छन्, जबकी ठूलो मात्रामा मतगणना हुनै बाँकी छ । ट्रम्पले अघिल्लो साँझ नै विजय घोषणा गर्ने आफ्नो योजना रहेको पनि सुनाएका छन् । ‘हामी ठूलो खुसीका लागि तयार हुँदै थियौं । हामीले सधै जितिरहेका थियौं र अचानक यो सबै रोकियो,’ उनले भने । ट्रम्पले निर्वाचनमा धाँधली भएको आरोप पनि लगाएका छन् । ‘यो अमेरिकी जनताप्रतिको ठगी हो । यो हाम्रो देशका लागि पीडादायी हो, ट्रम्पले भने,‘खुलस्त भन्नुपर्दा हामीले यो निर्वाचन जितेका थियौं ।’
ट्रम्पले यस्तो दाबी गरिरहेपनि धेरै राज्यहरुबाट अन्तिम मतपरिणाम आउन बाँकी नै छ । जर्जिया, मिचिगन, नेभादा, उत्तरी कारोलिना, पेन्सिलभेनिया, विस्कन्सिनलगायत राज्यको मतगणना सकिनैं बाँकी छ । यसमध्ये धेरैजसो राज्यमा ट्रम्प अगाडि देखिएका छन् । यद्यपी, मतान्त निकै साँघुरो भएकाले यी राज्यको पूर्ण नतिजा नआएसम्म कसले जित्न भनेर ठोकुवा गर्न कठिन छ ।
कोरोना भाइरसका कारण यस वर्ष हुलाकमार्फत भोट खसाल्ने मतदाताहरुको संख्या ठूलो देखिएको छ, उनीहरुले निर्वाचन मितिभन्दा केही दिनअघि नै भोट खसालेका थिए । यद्यपी, निर्वाचन सकिएपछि मात्रै उनीहरुको मतगणना हुन्छ । उनीहरुको मतगणना गर्न समय लागेकाले केही राज्यको अन्तिम मतपरिणाम आउन पनि ढिलाई भएको हो । ती मतदाताको प्रभाव निर्वाचनमा ठूलो पर्नसक्ने ठानिएको छ ।
