अगाडि नै दशैं बिदा दिने प्रस्ताव अस्वीकृत
कर्मचारीलाई बिदा दिएर सेवाग्राहीका काम थपिने मात्रै हो । असन, इन्द्रचोकमा भीडभाड भएकै छ । अफिसमात्रै बन्द गरेर के हुन्छ ?’
सोमबार साँझको मन्त्रिपरिषद् बैठकमा कोरोना संक्रमण व्यवस्थापन उच्चस्तरीय कार्यदल (सिसिएमसी) ले पर्सि कात्तिक १ गतेदेखि उपत्यकामा लकडाउनसरहको व्यवस्था गर्न सबै कार्यालयलाई दशैंका नाममा घटस्थापनादेखि नै बिदा दिने प्रस्ताव लग्दा प्रधानमन्त्री केपी शर्मा ओलीले माथिका भनाइ राख्दै अस्वीकार गर्नुभएको छ ।
प्रधानमन्त्रीको चाहना थियो, सकभर दशैं मान्ने नाममा काठमाडौंबाट मानिसहरु देशका विभिन्न भागमा नजाउन् । काठमाडौंमा भयावह बनेको कोभिड संक्रमण फैलिएर दूरदराज गाउँहरु प्रभावित भएमा त्यसले निम्त्याउने स्थिति झन् कहालिलाग्दो हुने उहाँको धारणा थियो । बरु, काठमाडौं छिर्ने र भारतीय सीमा नाकाहरुमा कडाइ गर्नुपर्ने कुरालाई निरन्तरता दिऔँ भन्नेमा जोड रह्यो ।
बरु, सिसिएमसीको पछिल्लो बैठकमा स्वास्थ्य मन्त्रालयले दिनको ९० हजारसम्म संक्रमित व्यक्ति पुग्नसक्ने डरलाग्दो आँकडा पेश गरेको छ । इटालीको जस्तो भयावह अवस्था नेपालका निम्ति टाढा नभएको भन्दै देशभर कम्तिमा पनि पाँच लाखसम्म संक्रमित पुग्ने अनुमान पेश भएको थियो । त्यसमाथि हाम्रो काम गराई नै कतिसम्म उल्टो छ भने, तीन महिना लगातारको लकडाउनमा स्वास्थ्य पूर्वाधारका कुनै काम भएनन् । अहिले काठमाडौंमा महामारी फैलिएपछि भएभरका सरकारी अस्पताललाई कोभिडका रुपमा कायम गर्न निर्देशन जारी भएको छ । जबकि, अस्पतालहरुमा उपकण अभाव शुरु भइसकेको धेरै भएको छ ।
विश्व स्वास्थ्य संगठनमा दोस्रो वरियताका हाकिम डा.नभारोले भनेकै छन्, ‘लकडाउन भनेको तयारीको लागि हो, उपचारका लागि होइन ।’ उनका अनुसार, कोरोनाको कारण विश्वमा गरिबको संख्या दोब्बर पुग्नेछ ।
सोमबारको मन्त्रिपरिषद्मा कोभिड संक्रमणबाट छिट्टै पूर्ववत् अवस्थामा फर्किएका पर्यटनमन्त्री योगेश भट्टराई सहभागी भएनन् । उनको कोभिड परीक्षणको पछिल्लो रिपोर्ट नेगेटिभ आएपछि केही दिन घरमै आराम गरिरहेका छन् । कोभिड देखिएकै कारण अस्पतालमा उपचार गराइरहेका शिक्षामन्त्री गिरिराजमणि पौडेल पनि सोमबारको बैठकमा गएनन् । संघीय मामिला तथा सामान्य प्रशासन मन्त्री हृदयेश त्रिपाठी अहिले अस्पतालमा छन् । उनी कोभिड संक्रमित भएका छैनन्, पेटको समस्याका कारण अस्पताल गएका हुन् ।
सोमबारको बैठकमा नेपाल सरकारका दुई सचिवले राजीनामा दिए । अवकास हुन लागेका सचिवहरु राजेन्द्र भारी (कृषि) र …….खनालले दिएको राजीनामा स्वीकृत भएको छ ।
त्यस्तै, साउन ३ गते सुनसरीमा गोली लागी निधन भएका एकजनाको उपचार खर्च सरकारले व्यहोर्ने निर्णय भएको छ । हरिनगरा– ७ जटबरामा सशस्त्रले चलाएको गोली लागेरसुकुम्बासी टोलका सहजब जट गम्भीर घाइते भएका थिए । सोही घटनामा देवानगञ्ज–२ का २३ वर्षीय पिन्टु यादव र राजेश यादव पनि घाइते भएका थिए । सहजबको धरानस्थित वीपी कोइराला स्वास्थ्य विज्ञान प्रतिष्ठानमा उपचारको क्रममा निधन भएपछि सरकारले उपचार खर्च साढे चार लाख व्यहोर्ने निर्णय गरेको हो । जनआस्थाबाट साभार
