वामदेव गौतमविरुद्ध दायर रिट निवेदनको सुनुवाइ आज
नेपाल कम्युनिष्ट पार्टी (नेकपा)का उपाध्यक्ष बामदेव गौतमको राष्ट्रिय सभा सदस्यता खारेजीको मागसहित सर्वाेच्च अदालतमा दायर रिट निवेदनउपर आज सुनुवाइ हुँदैछ ।
त्यस रिट निवेदनको सुनुवाइका लागि न्यायाधीश डा.आनन्दमोहन भट्टराईको एकल इजलासमा पेशी तोकिएको छ । वरिष्ठ अधिवक्ता दिनेश त्रिपाठीले दायर गरेका त्यो रिट निवेदन इजलासको दोस्रो नम्बरमै परेको छ । पहिलो नम्बरमा पनि राष्ट्रपतिको कार्यालयविरुद्ध अधिवक्ता बद्रीराज भट्टले दिएका निवेदनको सुनवाइको पेशी तोकिएको छ । केही बेरमै इजलास सञ्चालन हुने र त्यस रिटको सुनुवाइ हुने सर्वाेच्च अदालतले जनाएको छ ।
गत साता मन्त्रिपरिषदको सिफारिशमा राष्ट्रपति विद्यादेवी भण्डारीले गौतमलाई राष्ट्रिय सभा सदस्यमा मनोनित गरेकी थिइन् । विभिन्न क्षेत्रमा ख्याति प्राप्त व्यक्तिलाई सरकारको सिफारिशमा राष्ट्रपतिले मनोनीत गर्ने कोटामा गौतम सिफारिश भएका हुन् । त्यो स्थान डा.युवराज खतिवडाको कार्यकाल समाप्तिपछि रिक्त भएको थियो । गौतम प्रतिनिधिसभा सदस्य निर्वाचनमा वर्दियाबाट पराजित भएका थिए ।
प्रतिनिधिसभा सदस्यमा पराजित व्यक्तिलाई राष्ट्रिय सभामा मनोनीत गर्न थालिएको भन्दै वरिष्ठ अधिवक्ता त्रिपाठीले मनोनीत निर्णय खारेज गर्न माग गरेका छन् । प्रतिनिधिसभामा पराजित उम्मेदवारलाई मनोनीत गर्ने थलोको रुपमा राष्ट्रिय सभा परिणत भएको र नेपाली जनताको मतको अपमान भएको भन्दै रिट निवेदनमा प्रतिनिधिसभामा पराजित उम्मेदवारलाई राष्ट्रिय सभामा मनोनीत नगर्न नगराउन परमादेशको माग गरिएको छ ।
यस्तै राष्ट्रपतिबाट शपथ ग्रहण गरे पनि राष्ट्रिय सभाको सदस्यको हैसियतमा गौतमलाई कामकारबाही गर्नबाट रोक्न अन्तरिम आदेशको माग गर्दै त्रिपाठीले त्यस विषयमा सरकारलाई निर्देशनसहितको आदेश जारी गर्न माग गरेका छन् ।
यसअघि नेकपाकै प्रवक्ता नारायणकाजी श्रेष्ठ राष्ट्रिय सभा सदस्यमा निर्वाचित भएका थिए । उनी पनि गोरखा क्षेत्र नम्बर २ बाट प्रतिनिधि सभा सदस्यको निर्वाचनमा पराजित भएका थिए । पराजित श्रेष्ठलाई नेकपाले प्रदेश ४ बाट राष्ट्रिय सभामा उम्मेदवार बनाएर निर्वाचित गराएको थियो ।
