काेराेना संक्रमणबाट विराटनगर र जनकपुरमा तीन जनाकाे मृत्यु
काेराेना भाइरस (काेभिड-१९)काे संक्रमणबाट विराटनगर र जनपुरमा गरी ३ जनाकाे मृत्यु भएकाे छ । विराटनगरमा दुई र जनकपुरमा एक जनाकाे मृत्यु भएकाे हाे ।
कोरोना संक्रमणबाटै मोरङकाे विराटनगरस्थित कोशी अस्पतालअन्तर्गतको कोभिड–१९ उपचार केन्द्रमा विराटनगर महानगरपालिका-१० का ७६ वर्षीय पुरुष र मोरङको टंकीसिनुवारीस्थित विराट मेडिकल कलेजमा उपचाररत बुढीगंगा गाउँपालिका- ४ का ५२ वर्षीय पुरुषको मृत्यु भएकाे छ ।
७६ वर्षीय ती वृद्धमा ११ भदाैमा काेराेना संक्रमण पुष्टि भएको थियो । होम आइसोलेसनमा बसेका उनी स्वास्थ्य अवस्था असहज बनेपछि शनिबार अस्पताल भर्ना भएका थिए । उपचारकै क्रममा उनकाे मृत्यु भएको कोशी अस्पतालका मेडिकल सुपरिटेन्डेन्ट डा.चुमनलाल दासले जानकारी दिए । उनका अनुसार मृतकमा उच्च रक्तचापको समस्या थियो ।
त्यस्तै ५२ वर्षीय मृतक पुरुष १९ भदाैमा अस्पताल भर्ना भएका थिए । उपचारका क्रममा उनको आइतबार मृत्यु भएको विराट मेडिकल कलेजका कोभिड फोकल पर्सन डा.पुरु कोइरालाले जानकारी दिए । मृत्युपछि कोरोना परीक्षण गर्दा रिपोर्ट पोजिटिभ आएका उनमा उच्च रक्तचाप र मधुमेहको समस्या रहेको अस्पतालले जनाएको छ । मृतक पुरुषमा निमोनियाको पनि समस्या देखिएको थियो । योसँगै विराटनगरमा कोरोनाबाट मृत्यु हुनेको संख्या १५ पुगेको छ । प्रदेशमा ४३ जनाले कोरोना संक्रमणका कारण ज्यान गुमाइसकेका छन् ।
जनकपुरमा एक जनाकाे मृत्यु
यसैबीच, प्रादेशिक अस्पताल जनकपुरमा सिरहाको मिर्चैया नगरपालिका–५ का ६२ वर्षीय पुरुषको आइतबार राति मृत्यु भएको अस्पतालले जनाएको छ । मधुमेह र उच्च रक्तचापकाे समस्याबाट पीडित उनलाई लगातार पाँच दिनदेखि ज्वरो आएपछि फूलकुमारी मेमोरियल अस्पताल कर्जन्हा लगिएको थियो । त्यहाँ उनलाई कोरोनासँग मिल्दोजुल्दो लक्षण देखिएपछि स्वाब संकलन गरी प्रादेशिक जनस्वास्थ्य प्रयोगशाला जनकपुरमा परीक्षण गर्दा शनिबार राति उनको रिपाेर्ट पोजेटिभ आएको थियो । लगत्तै उनलाई आइतबार बिहान प्रादेशिक अस्पतालमा भर्ना गरिएका उनकाे भेन्टिलेटरमा राखेर उपचार थालिएको थियो । उपचारकै क्रममा आइतबार राति मृत्यु भएको डा. जामुन सिंहले बताए । मृतक पुरुष मिर्चैयामा ग्यास पसल सञ्जालक रहेको बताइएको छ ।
