प्रधानमन्त्रीलाई भीम रावलको प्रश्न,‘खै तपाइको राष्ट्रवाद’ ?
नेकपाका नेता तथा स्थायी कमिटी सदस्य भिम रावलले प्रधानमन्त्री केपी शर्मा ओलीको राष्ट्रवादमाथि प्रश्न उठाउनु भएको छ । नाकाबन्दीको समयमा देखाएको राष्ट्रवादलाई हेरेर नेकपालाई जनताले दुइतिहाई नजिक मत दिएपनि अहिले आएर प्रधानमन्त्रीको राष्ट्रवादले जनताले झुक्किएको महशुस गरिरहेको बताउनुभयो ।
नेपाली रेडियो नेटवर्कको नेपाली बहशमा पत्रकार ऋषि धमलासँग कुरागर्दै रावलले देशको नक्सा समेत सार्वजनिक गर्न नसक्ने नेतृत्वले राष्ट्रवादको कुरा गर्न नसुहाउने बताउनुभयो । उहाँले जतिबेला भारतले सड्क उद्घाटन गरेको खबर आयो, त्यही समयमा सरकारले भारतीय रादूतलाई बोलाएर कुटनीति नोट जारी गर्न नसक्नु सरकारको ठूलो कम्जोरी भएको बताउनुभयो ।
सीमा मिचिएको जस्तो गम्भिर विषयमा हाम्रो राजनीतिक नेतृत्व समेत सहि ढंगले उत्रन नसकेको भन्दै रावलले अहिले सम्म सीमाका विषयमा भारतमा रहेका नेपाली राजदुत र सम्बन्धि जिल्लाको सिडियोलाई समेत बर्तमान सरकारले के भएको हो भनेर सोध्ने काम समेत नगरेकाले सरकार भारतसँग कहि न कहि चुकेको देखिएको बताउनुभयो ।
उहाँले एउटा देशको नक्सा सार्वजनिक गर्न नसक्ने सरकारले कालापानीमा गएर सडक रोक्न सक्ने सम्भावना नहुने भन्दै यस्तो समयमा चुइक्क समेत बोल्न नसक्ने प्रधानमन्त्रीलाई राष्ट्रवादी भनेर कसरी भन्ने भन्दै प्रश्न गर्नुभयो । कालापानी, लिपुलेक र लिम्पियाधुरा नेपालको भूभाग हो भन्ने सवै प्रमाण प्रधानमन्त्रीसँग भएको रावलको दावी छ ।
रावलले भन्नुभयो,‘नेपाल भारत वा नेपाल चीनसंगको सम्बन्ध कस्तो छ भन्ने कुरा व्यवहारले देखाउने छ । अन्तराष्ट्रीय सम्बन्ध समितिले पर्खाल लगाउ कि काँडेतार लगाउ भनेर सुझाव दिइसकेको छ । सांसदहरुलाई दिएको रकम सीमा पालमुनि बसेका सुरक्षा कर्मीको सुरक्षामा लगाउनु पर्ने उहाँको धारणा रहेको छ ।
