मन्त्री अर्यालले भनिन् : लिम्पियाधुरा इतिहासदेखि नै नेपालको नक्सामा छैन
भूमि व्यवस्था, सहकारी तथा गरिबी निवारण मन्त्री पदमा अर्यालले लिम्पियाधुरा इतिहासदेखि नै नेपालको नक्सामा नभएको बताएपछि सरकार नै अप्ठेरोमा परेको छ । कालापानी र लिपुलेक अहिले नेपाली नक्साभित्रै रहेपनि लिम्पियाधुरा इतिहासदेखि नै नभएको बताएपछि आज अन्तर्राष्ट्रिय सम्बन्ध समितिमा बबाल भएको छ । नेकपाका नेता भीम रावलले समितिमा मन्त्री प्रदीप ज्ञवालीकै सामुन्नेमा मन्त्री अर्यालले त्यस्तो बोल्न मिल्छ भन्दै प्रश्न राखेका थिए ।
भारतीय हितको वकालत गर्ने ऋषि धमलाको रेडियोसँग कुरा गर्दै मन्त्री अर्यालले लिम्पियाधुरा नक्सामा नदेखिएपछि यो सहित राखेर नेपालको नक्सा प्रकाशित गर्ने तयारी भइरहेका बेला नेपाल भारत सीमा बार्ताको कुरा आएकाले नक्सा प्रकाशनमा ढिलाई भएको जानकारी दिएकी थिइन् । तर मन्त्री अर्यालले लिम्पियाधुरा नेपालको नक्सामै नभएको भनिन् भनेर भ्रम फिंजाउने काम भयो । जुन कुरा भीम रावलले पनि अन्तर्राष्ट्रिय समितिमा जोडदार रुपमा उठाएका थिए ।
मन्त्री अर्यालले भारतले नक्सामा यी भूभागहरु राखेर प्रकाशित गरेपछि यो कसरी पर्यो भन्ने विषयमा नेपाल सरकारले भारतसँग चासो राखेको बताएकी थिइन् । । उनले सीमाका विषयमा अहिलेको सरकारले पटक पटक भारत सरकारलाई नोट जारी गरी कुटनीतिक छलफलको तयारी गरिरहँदा कोरोना संक्रमण फैलिएकाले रोकिएको समेत जानकारी दिएकी थिइन् ।
