प्रधानमन्त्री थाक्नुभएकाले आराम गर्नुपर्ने भयो : महासचिव
यसअघि नै तय भइसकेको स्थायी कमिटी बैठक प्रधानमन्त्री ओलीले टार्न खोजेको आरोप प्रचण्ड-माधव नेपाल पक्षका पक्षका नेताहरुले लगाएका छन् । बैठक चाँडोभन्दा चाँडो बोलाइनुपर्ने नेताहरुको माग छ ।
तर, महासचिव विष्णु पौडेल भने विपक्षीहरुले सानो विषयलाई ठूलो बनाएको बताउँछन् । प्रधानमन्त्री ओली थाकेका कारण बैठक स्थगित गर्नुपरेको पौडेलको भनाइ छ । र, अध्यक्ष प्रचण्ड र आफूले प्रस्तावै तयार पार्न नभ्याएकाले पनि बैठक सार्नुपरेको महासचिव पौडेलको स्पष्टीकरण छ ।
‘प्रधानमन्त्रीले सचिवालय बैठकको सुरुमा आफ्ना कुराहरु राख्नुभयो, उहाँ थाक्नु पनि भएको थियो, आराम गर्नुपर्ने पनि थियो’ महासचिव पौडेलले अनलाइनखबरसँग भने, ‘मैले आफ्ना कुराहरु राखें, थाकेको पनि छु, बैठक चलाउँदै गर्नु है भनेर उहाँ आराम गर्न जानुभयो । भएको जम्माजम्मी त्यत्ति नै हो । तर, यसैलाई ठूलो विषय बनाइयो ।’
