माधव नेपालले भने,- म तेस्रो अध्यक्ष बन्दिँन, केपी – प्रचण्ड तनावमा
नेकपा वरिष्ठ नेता माधवकुमार नेपालले तेस्रो अध्यक्ष बन्न प्रधानमन्त्री एवं अध्यक्ष केपी शर्मा ओलीले गरेको प्रस्ताव अस्वीकार गरेका छन् । विहीबार साँझ प्रधानमन्त्री ओलीलाई टेलिफोन गरी वरिष्ठ नेता नेपालले तेस्रो अध्यक्षको प्रस्ताव अस्वीकार गरेको स्रोतले बताएको छ ।
बुधवार बसेको पार्टी सचिवालय बैठकमा ओलीले नेपाललाई तेस्रो वरियताको अध्यक्ष र वामदेव गौतमलाई भावी प्रधानमन्त्रीका रुपमा प्रस्ताव गरेका थिए । पार्टी सचिवालय, स्थायी र केन्द्रीय कमिटीमा अल्पमतमा परेका ओलीले अप्रत्यासितरुपमा यस्तो प्रस्ताव ल्याएका थिए । ओलीको प्रस्तावमा उपाध्यक्ष वामदेव गौतम केही आशावादी भएपनि अर्का अध्यक्ष पुष्पकमल दाहाल प्रचण्ड र वरिष्ठ नेता नेपालले गठजोड टुटाउने ओलीले यस्तो प्रस्ताव ल्याएको बताएका छन् ।
शनिवार सचिवालयको बैठक फेरी बस्दैछ । त्यो भन्दा पहिले चार नेताका निवासमा भिन्नाभन्नै बैठकहरु बसेका थिए । प्रधानमन्त्रीको बैठक सरकारी निवास बालुवाटारमा बसेको थियो भने अर्का अध्यक्ष दाहालको बैठक निवास खुमलटारमा बसेको थियो । प्रधानमन्त्रीको बैठकमा सचिवालय सदस्य इश्वर पोखरेल, गण्डकी प्रदेशका मुख्यमन्त्री पृथ्वी सुब्वा गुरुड, संसदीय दलका उपनेता सुवास नेम्वाड सहभागी थिए भने प्रचण्ड निवासमा भीम रावल, सुरेन्द्र पाण्डे, जनार्दन शर्मा, गोकर्ण बिष्ट र मात्रिका यादव थिए ।
बालुवाटारको बैठकले प्रधानमन्त्री र पार्टी अध्यक्ष नछोड्न ओलीलाई आग्रह गरेका थिए भने प्रचण्ड निवासको बैठकले दूवै पदबाट राजीनामा गराउने अडान नछोडन आग्रह गरेका थिए । दुई अध्यक्षको निवासमा भएका बैठकले भिन्नाभन्नै निस्कर्ष निकालेका छन् ।
उता वरिष्ठ नेता नेपालले प्रधानमन्त्री ओली र कार्यकारी अध्यक्ष प्रचण्डलाई टेलिफोन गरी आफु तेस्रो अध्यक्ष नबन्ने बताएका छन् । विहीबार दिउँसो अध्यक्ष प्रचण्डलाई टेलिफोन गरेर नेता नेपालले तेस्रो वरियताको अध्यक्ष नबन्ने बताएका थिए । जवाफमा प्रचण्डले ओलीको राजीनामा माग्ने अडानमै आफु रहेको र नेता नेपाललाई पनि रहन आग्रह गरेको स्रोतले बताएको छ ।
प्रचण्डसँग दिउँसो टेलिफोन सम्वाद गरेका नेपालले अपरान्न प्रधानमन्त्री ओलीलाई टेलिफोन गरेका थिए । ओलीसँग पनि नेपालले तेस्रो अध्यक्ष नबन्ने बताएका थिए । “तेस्रो अध्यक्ष बन्दैमा समस्या सामधान हुँदैन, विकल्प दिन तपाई तयार हुनुपर्दछ”, टेलिफोनमा नेता नेपालले भने ।
बुधवारको बैठकमा प्रधानमन्त्रीको प्रस्ताव आएपनि उपाध्यक्ष गौतमले पनि आफ्नो निवासमा छुट्टै छलफल गरेका छन् । प्रधानमन्त्री ओलीको प्रस्तावमा छलकपट नभए त्यसलाई सकारात्मकरुपमा लिनुपर्ने गौतमको धारणा थियो भने उनी निकट नेताहरुले अहिले नै प्रधानमन्त्री बन्न असम्भव रहेको बताएका थिए । “ओलीले चाँहदैनमा अहिले नै प्रधानमन्त्री बन्ने अबस्था छैन, तपाईलाई फेरी गुमराहमा राख्ने खेल भएको छ”, भन्दै उनी निकटका नेताहरुले सुझाव दिएका थिए ।
