प्रधानमन्त्री ओली प्रचण्डबीच आधा घण्टा कुराकानी
नेकपा अध्यक्ष पुष्पकमल दाहाल (प्रचण्ड) ले पार्टीका अध्यक्ष समेत रहेका प्रधानमन्त्री केपी शर्मा ओलीसँग शनिबार विहान भेट गरेका छन् ।
दोस्रो पटक मृगौला प्रत्यारोपण गरेर शुक्रबार (३० चैत्र) शिक्षण अस्पतालबाट डिस्चार्ज भएका ओलीलाई भेट्न नेकपा अध्यक्ष प्रचण्ड बालुवाटारस्थित प्रधानमन्त्री निवास पुगेका थिए ।
बालुवाटार स्रोतका अनुसार, प्रधानमन्त्री ओली र नेकपा अध्यक्ष प्रचण्डबीच करिव आधा घण्टा कुराकानी भएको थियो । मृगौला प्रत्यारोपणका लागि ओली १९ फागुनमा महाराजगञ्जस्थित शिक्षण अस्पताल भर्ना भएका थिए । २१ फागुनमा उनको मृगौला प्रत्यारोपण गरिएको थियो ।
ओली अस्पताल भर्ना हुनुअघि नेकपाभित्रको विवाद उत्कर्षमा थियो । वामदेव गौतमलाई कि युवराज खतिवडालाई राष्ट्रिय सभामा पठाउने भन्ने विषयमा नेकपा नेताहरु विभाजित भएका थिए ।
१५ फागुनमा भएको नेकपा सचिवालय बैठकले गौतमलाई राष्ट्रिय सभामा पठाउने निर्णय गरेकामा प्रधानमन्त्री ओली असहमत थिए । अर्थमन्त्री युवराज खतिवडालाई नै राष्ट्रिय सभामा पठाउनुपर्नेमा प्रधानमन्त्री ओलीको जोड थियो ।
सचिवालयले सर्वसम्मत निर्णय गरे पनि ओलीले त्यसलाई कार्यान्वयन गरेका छैनन्, जसले गर्दा नेकपाभित्र यस सम्बन्धी विवाद यथावत छ । पार्टी निर्णय नभएपनि २१ फागुनमा खतिवडा अर्थमन्त्रीमा पुन नियुक्त भइसकेका छन् ।
अध्यक्ष प्रचण्डको सचिवालयका अनुसार, भेटमा मृगौला प्रत्यारोपण सफलतापूर्वक सम्पन्न भएकोमा बधाई दिँदै शीघ्र स्थास्थ्यलाभको कामना गरेका थिए । यसैगरी समसामयिक राजनीतिक गतिविधिका बारेमा जानकारी पनि गराएका थिए ।
