कमल थापाले भने ‘अब म कहिल्यै पार्टी फुटाउँदिनँ’
राप्रपा अध्यक्ष कमल थापाले अब फेरि कहिल्यै नफुट्ने, नचुटिने, नअलग्गिने संकल्पका साथ एकीकृत भएको बताएका छन् । ‘म कहिल्यै पनि पार्टी फुटाउनेछैन’, उनले गीता छोएरै भने, ‘तपाईंहरूलाई विश्वास लागेन, मैले गीता ल्याएको छु । यो गीता हातमा राखेर हामी हिन्दू–राष्ट्र चाहने सनातन धर्मका पक्षपातीहरु यो गीता हातमा राखेर कसम खान्छु, राप्रपालाई कदापि फुट्न दिनेछैन । यो गीता उहाँहरुलाई पनि चाहिन्छ कि यहीं छाडेर जान्छु ।’
राप्रपा र राप्रपा संयुक्तको एकीकरण घोषणासभामा कार्यकर्ताले तामातुलसी र गीता स्टेजमै लगेका थिए । अध्यक्ष थापाले उनीहरूलाई फर्काएका थिए । कार्यक्रमलाई सम्बोधनका क्रममा उनले गीता छोएर पार्टी नफुटाउने कसम खाएका हुन् ।
‘पार्टी एकताको यो सुखद क्षणमा म एकीकृत राष्ट्रिय प्रजातान्त्रिक पार्टीका प्रथम अध्यक्ष स्वर्गीय पूर्वप्रधानमन्त्री सूर्यबहादुर थापालाई सम्झना गर्न चाहन्छु । यो पार्टीको स्थापनामा र पार्टीलाई नयाँ उचाइमा पु्याउने क्रममा उहाँको महत्वपूर्ण योगदान छ’, उनले राप्रपा र राप्रपा संयुक्तबीच एकता घोषणासभामा भने, ‘उहाँको दिवंगत आत्माको चीर शान्तिको कामना गर्दै हार्दिक श्रद्धाञ्जली अर्पण गर्दछु ।’
उनले यो एकताबाट आफू एकदमै खुसी रहेको बताए । ‘पार्टी विभाजन भएको दिनदेखि जुन पीडा मैले भोगेको थिएँ त्यसलाई म शब्दमा वर्णन गर्न सक्दिनँ’, उनले भने, ‘र आज पार्टी एकता भएको घडीमा म साह्रै खुसी छु । एकताका निम्ति योगदान पुर्याउने सबै साथीहरुलाई धन्यवाद दिन चाहन्छु । मेरो बोझ पनि घटेको छ । विगतमा अध्यक्ष भएर एक्लैले बोक्नुपरेको भार अहिले दुई बलिष्ठ काँधहरुसँग मैले सेयर गर्ने सौभाग्य पाएको छु । यो जिम्मेवारी वहन गर्न तयार भइदिनुभएकोमा म आदरणीय पशुपतिशमशेर राणा र डा. प्रकाशचन्द्र लोहनीज्यूप्रति आभारी छु ।’
