पूर्वसभामुख महरा : जेल जान्छन् कि छुट्छन् ?
पूर्वसभामुख कृष्णबहादुर महराविरुद्धको मुद्दाबारे आज (सोमबार) काठमाडौ जिल्ला अदालतले फैसला गर्दैछ । हिजो (आइतबार) पूर्वसभामुख महराको अन्तिम सुनुवाई भएको थियो ।
हिजो महराको पक्षबाट रमणकुमार श्रेष्ठ, शेरबहादुर केसी, भीमार्जुन आचार्य, लव मैनाली, सवितालगायतले बहस गरेका थिए । तर, समय अभावले फैसला हुन नसकेपछि आजको लागि तय गरिएको हो ।
त्यसअघि सरकारी वकिलको तर्फबाट बहस भएको थियो । सरकारी वकिलको तर्फबाट बहस सकिएपछि महराको पक्षबाट बहस चलेको थियो ।
काठमाडौं जिल्ला अदालतका श्रेस्तेदार आनन्द श्रेष्ठका अनुसार महरामाथि लागेको अभियोगबारे सम्भवतः सोमबार फैसला आउने जानकारी दिए ।
उनले भने–‘समय अभावले मुद्दा हेर्दाहेर्दैमा राखिएको छ । सम्भवतः सोमबार फैसला आउँछ ।,’
गत असोज १९ गते संसद् सचिवालयकी महिला कर्मचारीलाई बलात्कार प्रयास गरेको महरा पक्राउ गरेका थिए । बलात्कारको अभियोगमा महरामाथि मुद्दा चलाइएको थियो । हाल उनी पुर्पक्षका लागि डिल्लीबजार कारागारमा छन् ।
यसअघि कात्तिक १८ गते जिल्ला न्यायाधीश सुदर्शन पाण्डेको एकल इजलासले महरालाई थुनामै राखेर मुद्दा अघि बढाउन आदेश दिएको थियो ।
जिल्ला अदालतको फैसलामा चित्त नबुझेपछि गत मङ्सिर ५ गते महराले जिल्ला अदालतको थुनामा पठाउन गरिएको आदेश गैरकानूनी भएकाले साधारण तारेखमा रही पुर्पक्ष गरीपाऊँ भन्ने आग्रहसहित उच्च अदालतमा निवेदन दर्ता गरेका थिए ।
त्यसेबला उच्च अदालत पाटनले धरौटीमा छाड्न अस्वीकार गरेको थियो । मुख्य न्यायाधीश नहकुल सुवेदी र टेकनारायण कुँवरको इजलासले महरालाई धरौटीमा छाड्न अस्वीकार गर्दै काठमाडौं जिल्ला अदालतले पुर्पक्षका लागि महरालाई थुनामा पठाउने आदेशलाई सदर गरेको थियो ।
