फरार गच्छदार प्रधानमन्त्री निवास बालुवाटारमा
ललिता निवासको सरकारी जग्गामा अभियुक्त बनाउन लागेको थाहा पाएपछि नेपाली कांग्रेसका उपसभापति बिजयकुमार गच्छदार बुधवार प्रधानमन्त्री केपी शर्मा ओलीलाई भेट्न सरकारी निवासमा पुगे ।
सुरक्षा पीएसओ र प्रहरीको पछुवा लिएर प्रधानमन्त्री ओलीलाई भेटेका गच्छदार लगतै कांग्रेस सभापति शेरबहादुर देउवा निवास बुढानीलकण्ठ पुगेका थिए । दिनभर सुरक्षा घेरामा रहेका गच्छदारलाई अख्तियारले भने फरार अभियुक्त भन्दै उनीबिरुद्ध भ्रष्टाचारको मुद्दा दायर गरेको छ ।
ललिता निवासको सरकारी जग्गा नक्कली मोही खडा गरी ब्यक्तिको नाममा लिएको भन्दै १ सय १० जनाबिरुद्ध अख्तियारले बुधवार मुद्दा चलायो । तर मुद्दा चलाएका कुनै पनि ब्यक्तिलाई पक्राउ गरी अदालतमा भने पुरयाइएको छैन । म्ुद्दा दर्ता गर्दा अभियुक्तलाई पनि अदातलमा उपस्थित गराउनु पर्ने कानुनी प्रावधान छ । तर अख्तियारले १ सय १० जनालाई नै फरार भन्दै मुद्दा दायर गरेको छ ।
मुख्य मतियार जग्गा दलालहरु प्रहरीको घेरामा नभएपनि गच्छदार, भूमिसुधारमन्त्री डम्बर श्रेष्ठ र अर्का पूर्वमन्त्री चन्द्रदेव जोशी प्रहरीको सुरक्षामै थिए । तर उनीहरुलाई पक्राउ गरी अदालतमा उपस्थित गराउने आँट अख्तियारले गर्न सकेन ।
पूर्वमन्त्री र पूर्वसचिवहरु दीप बस्न्यात, छविराज पन्त, दिनेशहरि अधिकारी सुरक्षाको घेरामै थिए । उनीहरुलाई बयान दिन अख्तियारले कार्यालयमै बोलाएपनि मुद्दा चलाउँदा फरारी भन्ने शब्द प्रयोग गरेको छ । अख्तियारले मुद्दा दायर गरेपछि गच्छदार सांसदबाट पनि निलम्बनमा परी सकेका छन् । तरपनि उनका अघिपछि सुरक्षाकर्मीको साइरन बजिनै रहेको छ । प्रहरीको सुरक्षा घेरामा रहेका गच्छदारलाई पक्राउ गर्ने आँट अख्तियार गर्न नसकेको तर्क कानुनबिद्हरुले बताएका छन् ।
-गच्छदार साइरन बजाएर हिडिरहेका छन् तर अख्तियार भन्छ, -उहाँ फरार हुनुहुन्छ, ति कानुन ब्यवसायीले भने -अख्तियार पक्राउ गर्न डराएकै हो । गच्छदार लगायत कुनैपनि ब्यक्तिलाई पक्राउ गरिएको छैन । मुद्दा दायर भएका ब्यक्तिहरु सुरक्षा घेरामै अदालतमा स्वच्छिकरुपमा उपस्थित हुनेछन् ।
