नेवि संघका महामन्त्री नै सात जना, अझै पाँच थप्ने तयारी
कांग्रेस सभापति शेरबहादुर देउवाले नेपाल विद्यार्थी संघमा किस्ता–किस्तामा नेतृत्व मनोनयन गर्न थालेका छन् । उनले आइतबार दुई उपाध्यक्ष र पाँच महामन्त्री थप गरी तदर्थ केन्द्रीय कार्यसमिति विस्तार गरेका हुन् । कार्यसमितिलाई पूर्णता दिन अझै कम्तीमा दुई चरण लाग्ने देखिन्छ– पहिलो, सहमहामन्त्री र कोषाध्यक्ष अनि दोस्रोमा सदस्य ।
उपसभापतिमा तुलसा पन्त (झापा), मुक्तिराज पौडेल (रुपन्देही) अनि महामन्त्रीमा दीपक भट्टराई (तनहुँ), उर्मिला थपलिया (धादिङ), प्रभातकुमार दाहाल (मकवानपुर), बलदेव तिमल्सिना (सिन्धुपाल्चोक) र युवराज पाण्डे (स्याङजा) छन् । बाँकी पदाधिकारी र सदस्यहरुको मनोनयन यथाशिघ्र गरिने पार्टी केन्द्रीय कार्यालयका मुख्य सचिव कृष्णप्रसाद पौडेलले बताए । उनका अनुसार कांग्रेस केन्द्रीय कार्यसमितिको २०७५ फागुन १ को निर्णयबमोजित पार्टी सभापति देउवाले संघमा पदाधिकारी मनोनयन गरेका हुन् ।
देउवाले केही दिनअघि राजीव ढुंगाना (सुनसरी)लाई अध्यक्ष र मनोज वैद्य (काठमाडौं अनि महेश्वरी कुँवर (पाल्पा)लाई महामन्त्री बनाएर तदर्थ कार्यसमिति गठन गरेका थिए । नवनियुक्त अध्यक्ष ढुंगानाको उमेरलाई लिएर नकारात्मक टिप्पणी भइरहेको छ । उनले आफ्नो उमेर ४६ भएको स्वीकार गरेका छन् । तर, ५६ वर्षका भनेर गलत प्रचार गरिएको उनको दुखेसो छ ।
स्रोतका अनुसार नेताहरूले आआफूनिकट विद्यार्थी नेतालाई अघि सारेकाले किस्ताबन्दीमा मनोनयन भइरहेको हो । त्यसमा पनि उमेर हदलाई लिएर असन्तुष्टि देखिएको छ । कांग्रेसले २०७५ माघ २९ गतेसम्म ३२ वर्ष उमेर ननाघेका विद्यार्थीले मात्रै संघको आगामी १२ औं अधिवेशनमा भाग लिन पाउने नियम बनाएको छ । अहिले भने उमेर ढल्केकाहरुलाई नेतृत्वमा ल्याइएकामा विद्यार्थी नेताले असन्तुष्टि जनाएका छन् ।
