संसदीय समितिमा थपिए विष्ट देखि पण्डित सम्म
मन्त्री पदबाट हटाइएका नेकपाका नेता संसदीय संसदीय सदस्य चयन भएका छन् । सभामुख अग्निप्रसाद सापकोटाले प्रतिनिधिसभा नियमावली २०७५ को नियम १७२ बमोजिम गठित विभिन्न समितिका सदस्यको नाम हेरफेर गरेका हुन्।
गोकर्णराज विष्ट र पदम गिरी अर्थ समिति, शिवमाया तुम्बाहाङफे र मायादेवी न्यौपाने उद्योग तथा वाणिज्य र श्रम तथा उपभोक्ता हित समिति, मात्रिकाप्रसाद यादव र रामकुमारी चौधरी कानुन न्याय तथा मानवअधिकार समितिमा रहने भएका छन् ।
यस्तै थममाया थापा महिला तथा सामाजिक समिति, लालबाबु पण्डित राज्यव्यवस्था तथा सुशासन समिति, विद्या भट्टराई शिक्षा तथा स्वास्थ्य समिति, चक्रपाणि खनाल, रघुवीर महासेठ र धनबहादुर बुढा सार्वजनिक लेखा समितिमा रहनेछन् । प्रस्तावित नाममा प्रतिनिधिसभा बैठकले सहमति जनाएको छ ।
विष्ट, यादव, थापा, पण्डित, खनाल, महासेठ, चौधरी र बुढा मन्त्रिपरिषद् पुनर्गठनका बेला हटाइएका थिए । तुम्बाहाङफे निवर्तमान उपसभामुख हुन् । उनी हाली नेकपा केन्द्रीय सदस्य मनोनित भएकी छन् ।
कार्यव्यवस्था परामर्श समितिमा प्रभू साह
बैठकले कार्यव्यवस्था परामर्श समितिसदस्यको नाम पनि हेरफेर गरेको छ । रामेश्वर राय यादवको ठाउँमा प्रभु साहको नाम हेरफेर गर्ने सभामुखको प्रस्तावलाई बैठकले सहमति जनाएको थियो । सभामुखले प्रतिनिधिसभा नियमावली २०७५ को नियम १३ बमोजिम परामर्श समितिको सदस्यको नामावली हेरफेर गरेका हुन्।
