नेकपामा दिनभर केन्द्रीय कमिटी, साँझ गुट भेला
पार्टी एकताको २० महिनापछि नेकपा केन्द्रीय समितिको दोस्रो बैठक राजधानी काठमाडौंमा बुधवारदेखि शुरु भएको छ । दोस्रो बैठकको पहिलो दिन पार्टी अध्यक्ष एवं प्रधानमन्त्री केपी शर्मा ओलीले सरकारको रक्षा गर्दै २ घण्टा लामो उद्घाटन मन्तब्य दिए भने अर्का अध्यक्ष पुष्पकमल दाहाल प्रचण्डले राजनीतिक प्रतिबेदन र महासचिव बिष्णु पौडेलले सांगठनिक र विधान संशोधन प्रस्ताव पेश गरे ।
दिनभर पार्टीको बैठकमा रहेका केन्द्रीय सदस्यहरु साँझ भने गुटगट छलफलमा केन्द्रीत भएका थिए । नेकपाभित्रका तीन समुहले आफु निकटका केन्द्रीय सदस्यहरुलाई बोलाएर छलफल गरेको स्रोतले बताएको छ ।
प्रधानमन्त्री ओली समुहले एमसीसी र सरकारको रक्षाका बिषयमा उभिन केन्द्रीय सदस्यहरुलाई निर्देशन दिएको छ । प्रधानमन्त्री ओलीले पनि पनि उद्घाटन मन्तब्यमा आफ्नो र सरकारको बचाउन गरेका थिए ।
अर्का अध्यक्ष दाहालले पनि केन्द्रीय समितिमा कसरी प्रस्तुत हुने बिषयमा आफु निकटका नेताहरुसँग छलफल गरेका थिए । सीमा विवाद र पार्टीको बैचारिक नीतिका बिषयमा आफ्ना कुरा राख्न दाहाल समुहले निर्देशन दिएको स्रोतले बताएको छ ।
त्यसैगरी बरिष्ठ नेता माधव नेपाल समुहले पनि आफु निकटका केन्द्रीय सदस्यहरुसँग छलफल गरेको थियो । पार्टीको बैचारिक नीतिका बिषयमा बढी केन्द्रीत भएको नेपाल समुहले पार्टीको पोलिटब्यूरा गठन, एमसीसीका बिषयमा निर्देशन दिएको छ । नेपाल समुह एमसीसीका केही बुँदा सच्याएर मात्र पारित गर्नूपर्ने पक्षमा छ । ओली र दाहाल समुह भने जस्ताको तस्तै पारित गर्ने पक्षमा छ ।
