के गर्ला सर्वोच्चले फैसला, अग्नी परीक्षामा सापकोटा
प्रतिनिधि सभामा सभामुख चयनका लागि आज (आइतबार) निर्वाचन हुँदैछ ।सभामुख चयनको प्रक्रिया अगाडि बढाउन आज दिउँसो ३ बजे प्रतिनिधि सभाको बैठक बोलाइएको भने आजै सर्वोच्च अदालतले सपकोटालाई हाजिर हुन भनेको छ ।
वरिष्ठ अधिवक्ता दिनेश त्रिपाठीले दायर गरेको रिटको पेशी तोक्दै सर्वोच्च अदालतले सापकोटासहित विपक्षी बनाइएका व्यक्ति तथा निकाय र रिट निवेदनलाई आज बिहान १० बजे तारेखका लागि हाजिर हुन आदेश दिएको हो ।
सभामुखमा नेपाल कम्युनिस्ट पार्टी (नेकपा)का तर्फबाट स्थायी समिति सदस्य अग्नीप्रसाद सापकोटाको एकल मनोनयन परेको छ ।
सापकोटाको मात्र एकल मनोनयन परेकाले प्रतिनिधि सभा नियमावलीको व्यवस्था अनुसार उनी निर्विरोध हुने छन् । बैठकमा सापकोटाका तर्फबाट प्रस्तावक सुवासचन्द्र नेम्वाङले उम्मेदवारको प्रस्ताव पेस गर्नेछन् । वक्तव्यसहित पेस हुने प्रस्तावमा समर्थकले धारणा राख्ने छन् । सापकोटाको समर्थकमा पूर्वसभामुख ओनसरी घर्ती, नेकपाका संसदीय दलका प्रमुख सचेतक देवप्रसाद गुरुङ छन् ।
यसैगरी राष्ट्रिय जनता पार्टी (राजपा) नेपालका सांसद लक्ष्मणलाल कर्णले पनि सापकोटाको उम्मेदवारीमा समर्थन गर्नेछन् ।
प्रतिनिधि सभा नियमावलीको नियम ७ को व्यवस्था अनुसार एक मनोनयन परेकाले प्रस्तावक र समर्थकले धारणा राखेपछि सभाध्यक्षबाट सापकोटालाई निर्विरोध सभामुख चयन भएको घोषण हुनेछ । नियमावली अनुसार एकल मनोनयन परेमा निर्विरोध हुने व्यवस्था छ ।
वरिष्ठ अधिवक्ता त्रिपाठीले गत शुक्रबार सर्वोच्च अदालतमा रिट दायर गरेका थिए ।
द्वन्द्वकालीन घटनामा कर्तव्य ज्यानको मुद्दा खेपिरहेका व्यक्ति सापकोटालाई सभामुख चयन नगर्नका लागि आदेश माग गरेका छन् । सापकोटालाई गिरफ्तार गरी न्यायलयमा उपस्थित गराउने आदेश जारी गर्न पनि उनले मागदाबी गरेका छन् । तर, प्रतिनिधि सभाको बैठकबाट सापकोटालाई निर्विरोध सभामुख चयन भएको घोषणा गर्ने आर्यसूची छ ।
