लाख ऋण दिएर करोड असुल्ने मिटरब्याजीलाई चिनौँ

 

राष्ट्रिय जनता पार्टीका केन्द्रीय सदस्य तथा मधेस क्षेत्रका मिटरब्याजी रामबाबु यादव पक्राउ परेका छन् । गृहमन्त्री रामबहादुर थापा बादलको निर्देशनमा यादवलाई प्रहरीले पक्राउ गरेको हो । सर्लाहीका किसानहरुलाई लाख रुपैया ब्याजमा लिएर उनले करोड उठाउने गरेका थिए । कतिपय किसानको रकम र जग्गा जमिन हड्पेको आरोप लागेपछि नेकपाका शीर्ष नेताहरुले नै यादवलाई पक्राउ गर्न गृहमन्त्रीलाई आग्रह गरेका थिए ।

जिल्ला प्रहरी कार्यालय सर्लाहीले यादवलाई बुधवार पक्राउ गरेको छ । ‘यादवलाई पक्राउ गरी प्रारम्भीक अनुसन्धान थालेका छौ’ नेपाल प्रहरीका प्रवक्ता शैलेस थापाले भने । यादवले सर्लाहीका रामप्रवेश महतो, सुरेश शाह, सहदेव राय, मोह शाह, पिताम्बर महतो, बिकाउ ठाकुर, राजुप्रसाद कुसवाह, कपुरी ठाकुरबाट लाख ऋण दिएर करोड असुलेको आरोप लागेको छ । यादवले घर खेल नै खाइदिएपछि पीडितहरु न्याय माग्दै काठमाडौं आइपुगेका छन् ।

काठमाडौं आएका पीडितहरुले नेकपाका बरिष्ठ नेता माधवकुमार नेपाललाई भेटेका थिए । नेपालले पीडित लगेर सोमबार अध्यक्ष प्रचण्ड निवास खुमलटार पुगेका थिए । अध्यक्ष दाहालले गृहमन्त्री थापालाई त्यहीबाट टेलिफोन गरी यादवलाई पक्राउ गर्न निर्देशन दिएका थिए ।
यादव गत स्थानीय निर्वाचनमा बरहथवा नगरपालिकाबाट मेयर पदका प्रत्यासी थिए । तर उनी तेस्रो स्थानमा परेका थिए ।