रामचन्द्र पौडेलले भने नेपाली कांग्रेस केही समयमै सकिन्छ
नेपाली कांग्रेसका वरिष्ठ नेता रामचन्द्र पौडेलले आन्तरिक विवाद अन्त्य नभए पार्टी केही समयमै समाप्त हुने चेतावनी दिनुभएको छ ।
चितवनको रत्ननगरमा आयोजित कार्यक्रममा नेता पौडेलले आपसी विवाद छाडेर पार्टीलाई विकृतिमुक्त बनाउनुपर्ने बताउनुभएको हो ।
उहाँले पार्टीभित्रको आन्तरिक किचलो अन्त्य गर्दै एकढिक्का भएर आगामी निर्वाचनका लागि तयार हुन भन्दै ९ बुँदे लिखित प्रस्ताव गर्दा पनि सभापति देउवाले आफ्ना सुझाव सम्बोधन नै नगरेको बताउनुभयो ।
वरिष्ठ नेता पौडेल समूहले पार्टीको केन्द्रीय कार्यसमिति बैठक समेत पटक पटक बहिस्कार गर्दै आएको छ । आफ्ना मागपूरा नभएसम्म बैठकमा सहभागि नहुने अडान पौडेल पक्षले लिएको छ ।
लोकतन्त्र र प्रजातन्त्रलाई बचाउन कांग्रेस सक्षम : नेता
कोइराला
नेपाली कांग्रेसका केन्द्रीय सदस्य डा शेखर कोइरालाले लोकतन्त्र र प्रजातन्त्रलाई बचाउन आफ्नो पार्टी सक्षम रहेको बताउनुभएको छ ।
नेपाल तरुण दल क्षेत्र नं ६ मोरङद्वारा शनिबार यहाँ आयोजित तरुण भेला तथा पार्टी प्रवेश कार्यक्रमलाई सम्बोधन गर्दै नेता कोइरालाले कांग्रेस लोकतन्त्रलाई धरापमा पार्ने शक्तिसँग जुध्न तयार रहेकामा जोड दिनुभयो ।
कोइरालाले सरकारले देशमा महँगी र भ्रष्टाचारलाई नियन्त्रण गरी आम जनतालाई अनुभूति दिने किसिमको काम गर्न सरकारलाई सुझाव दिनुभयो ।
आजदेखि देशभरिकै मौसम सुधार
आइतबारदेखि देशभरिकै मौसममा सुधार आउने मौसमविद्ले बताएका छन । पश्चिमी वायुको प्रभाव कमजोर हुँदै गएकाले आइतबार र सोमबार देशभरकै मौसम सामान्यतया सफा हुने मौसमविद् प्रतिभा मानन्धरले जानकारी दिनुभयो ।
अहिले काठमाडौंसहित देशका केही ठाउँमा देखिएको कुहिरो पनि दिउँसोपछि हट्दै गएर घाम लाग्ने मौसमविद् मानन्धरले बताउनुभयो । सोमबार पनि सामान्यतया देशभरिकै मौसम सफा हुनेछ । नयाँ मौसमी प्रणाली देखिएकाले मङ्गलबारदेखि भने फेरि मौसम बदली हुने सम्भावना रहेको उहाँले बताउनुभयो ।
आइतबार बिहान काठमाडौं उपत्यकाको न्यूनतम तापक्रम ४ दशमलव ५ डिग्री सेल्सियस मापन गरिएको छ । केही दिन यता पश्चिमी वायुको प्रभावका कारण देशभर पानी र हिउँ पर्दा जनजीवन प्रभावित भएको थियो ।
मानबहादुर तामाङ
