प्रदेश २ मा मुख्यमन्त्री राउत बिरुद्ध अविश्वासको प्रस्ताव, सरकार ढल्यो
समाजवादी पार्टी संघिय सरकारबाट बाहिरिएलगतै प्रदेश २ को सरकार संकटमा परेको छ । प्रदेश नम्वर २ का मुख्यमन्त्री लालबाबु राउतको नेकपा र राजपाका सांसदहरुले राजीनामा मागेका छन् । नेकपा, राजपा र कांग्रेस सांसदहरुले राजीनामा मागेपछि लालबाबुको मुख्यमन्त्री पद धरापमा परेको छ ।
प्रदेश २ नेकपा संसदीय दलका नेता सत्यनारायण मण्डलले मुख्यमन्त्री राउतलाई पदबाट राजीनामा दिन सार्वजनिक आग्रह गरेका छन् । राजीनामा नदिए अविश्वासको प्रस्ताव ल्याउने चेतावनी दिएका छन् ।
-अहिले समय नै तोकेर मुख्यमन्त्रीलाई राजीनामा दिन भनेका छौ, उहाँले मान्नुभएन भने अविश्वासको प्रस्ताव ल्याउँछौ, -नेकपा स्थायी कमिटी सदस्य समेत रहेका मण्डलले भने -प्रदेश २ को सरकार परिवर्तन हुन्छ, जनताप्रति अनुदार सरकार हामीलाई चाहिदैन ।
प्रदेश २ को सरकार ढाल्न नेकपा र राजपाका सांसदहरुले गठजोड नै गरेका छन् । नेकपा र राजपाका सांसदहरुले सोमबारदेखि चलेको प्रदेश संसदमा सरकारको कडा आलोचना गरे । आलोचना मात्र भएन, संसद बैठक नै अबरुद्ध पारे । अबरुद्ध संसद बसेको केही मिनेटमै स्थगित भएको थियो ।
प्रदेश २ मा समाजवादी र राजपाको गठबन्धन सरकार छ । केन्द्रीय राजनीतिमा राजपा र समाजवादीबीच दुरी टाढा भएको छ । नेकपा र राजपाबीच सम्बन्ध सुधार छ । प्रदेश २ मा नेकपा र राजपा सरकारबीच संयुक्त सरकार बने संघ सरकारमा पनि राजपाले पाइला टेक्नेछ ।
प्रदेश २ मा नेकपा र राजपाले औपचारिक गठबन्धन गरिसकेका छन् । -कांग्रेस सांसदहरुसँग पनि हाम्रो सहमति भएको छ- नेकपा संसदीय दलका सचेतक सुन्दरबहादुर विश्वकर्माले भने । पछिल्लो समय समाजवादी पार्टी र मुख्यमन्त्री राउत एक्लो बनेका छन् ।
केही महिना पहिले नेकपा अध्यक्ष पुष्पकमल दाहाल प्रचण्डले नसच्चिए प्रदेश २ को सरकार ढालिदिने चेतावनी दिएका थिए । त्यसलाई समाजवादी र मुख्यमन्त्री राउतले घुर्किका रुपमा बुझे । तर अहिले दाहालकै कदमका कारण उनको सरकार धरापमा परेको छ ।
