रेशम चौधरी रिहा हुने अनि राजपा सरकारमा जाने
समाजवादी पार्टी सरकारबाट बाहिरिदा राजपा सरकारमा जाने चर्चा राजनीतिक बजारमा चल्न थालेको छ । तर राजपाले भने सरकारमा जान दुई सर्त राखेको छ । पहिलो संबिधान संशोधन, दोस्रो रेशम चौधरीको रिहाई ।
केही दिनअघि मात्र राष्टियसभा निर्वाचनका लागि नेकपासँग चुनावी तालमेल गरेको राजपाले सरकारमा जान दुई लिखित सर्तको माग गरेको छ । समाजवादीले सरकार नछोड्दै राजपाले नेकपासँग दुई सर्त राखेको थियो ।
संविधान संशोधनमा राजपा र समाजवादीबीच यसअघि कुरा मिलेको थिएन । संविधानको जुन बुँदा राजपाले संशोधन गर्न चाहेको थियो, त्यो बुँदा समाजवादीले संशोधन गर्न चाहेको थिएन । दुई मधेसवादी दलको कुरा नमिलेका कारण प्रधानमन्त्री केपी शर्मा ओलीले संविधान संशोधन प्रस्तावअघि बढाउन सकेका थिएनन् ।
राजपा नेता र नेकपा अध्यक्ष पुष्पकमल दाहाल प्रचण्डबीच सरकारमा सहयात्रा गर्ने बिषयमा कुरा चलिरहेको छ । तर निस्कर्ष निस्किसकेको छैन, नेकपाका एक स्थायी कमिटी सदस्यले भने । सरकारमा सहयात्रा गर्नका लागि राजपाले पहिलो सर्त संविधान संशोधनलाई राखेको छ भने दोस्रो सर्त रेशम चौधरीको रिहाई बनाएको छ ।
सत्तारुढ दल नेकपा संविधान संशोधनका लागि तयार भएपनि अदालतको आदेशअनुसार जन्मकैदको फैसला पाएका चौधरीलाई रिहा गर्न तयार भएको छैन । चौधरीलाई रिहा गर्दा कानुनी र नागरिक जगतबाट ठुलो विरोध हुने आँकलन नेकपाले गरेको छ । तर राजपाले भने यसलाई बटमलाइन बनाएको छ ।
राजपालाई फकाउन रेशम चौधरीलाई जेलबाट सिंहदरवार ल्याएर समथ गराइएको थियो । सपथ लिएको केही महिनापछि नै कैलाली जिल्ला अदालतले उनलाई जन्मकैदको फैसला सुनाएको थियो । सरकारमा जान राजपा तयार भएको छ । तर केही लिखित प्रतिबद्धता भने खोजिरहेको छ ।
