कांग्रेससँग मिलेर सडक आन्दोलन गर्ने बाबुराम भट्टराईको चेतावनी
समाजवादी पार्टी नेपालका संघीय परिषद् अध्यक्ष डा.बाबुराम भट्टराईले अब सडक आन्दोलन थाल्ने बताएका छन् । केपी शर्मा ओली नेतृत्वको सरकारलाई दिइएको समर्थन फिर्ता लिन आयोजित पत्रकार सम्मेलनमा बोल्दै डा. भट्टराईले संविधान संशोधन र नागरिकतलाई लिएर सडक आन्दोलन गर्ने बताए ।
‘हामीले लामो समयदेखि संविधान र शासकीय स्वरुपमा असहमति राख्दै आएका छौँ’, उनले भने, ‘ओली नेतृत्वको सरकारले संविधान संशोधन गर्न मानेन । अब हामी प्रतिपक्षमा बसेर आन्दोलन गर्छौँ । अब सडक आन्दोलन गर्ने पालो आयो, हामी सडकमा जान्छौँ ।’ भट्टराईले प्रमुख प्रतिपक्षी दल नेपाली कांग्रेससँग मुद्दाका आधारमा सहकार्य हुने बताएका छन् ।
‘प्रतिपक्षमा भएपछि विचार र मुद्दा मिल्नेसँग मिल्नु नै धर्म हुन्छ । प्रमुख प्रतिपक्षी दल नेपाली कांग्रेस, प्रतिपक्षी राप्रपासँग विचार र मुद्दाका आधारमा सहकार्य हुन्छ,’ उनले भने ।
सभामुख चयन प्रक्रियामा समाजवादी पार्टीको कुनै लोभ नभएको पनि उनले बताए । ‘सभामुख चयन प्रक्रिया अब अघि बढ्ला । नेकपासँग बहुमत छँदैछ,’ उनले भने, ‘हाम्रोतर्फबाट कुनै लोभ छैन । आकांक्षा छैन ।’
प्रधानमन्त्री ओलीले संविधान संशोधन गर्न नमानेपछि समाजवादी पार्टीबाट मन्त्री बनेका यादव र मोहम्मद इस्तियाक राईले मंगलबार राजीनामा दिएका थिए । समाजवादीले बुधबार ओली सरकारलाई दिएको समर्थन फिर्ता लिने निर्णय गरेको छ ।
समाजवादीका अध्यक्ष उपेन्द्र यादवले नेकपा अध्यक्ष केपी शर्मा ओली नेतृत्वको सरकारको दुईतिहाइको दम्भ समाप्त भएको बताएका छन् । मंगलबार उपप्रधान एवं कानुन, न्याय तथा संसदीय मामिला पदबाट राजीनामा दिएका यादवले बुधबार पत्रकार सम्मेलनमा सरकार छाड्नुको कारणबारे बोलेका हुन् । सरकारमा कम्युनिस्ट मात्र होइन, अरु पनि छन् भन्ने अब नरहेको उनले बताए । समाजवादी बाहिरिनु पनि सरकारको अर्को असफलता भएको उनले उल्लेख गरे ।
समाजवादीले सरकारलाई दिएको समर्थन फिर्ता लिएको छ । बुधबार बसेको कार्यकारिणी समिति बैठकले समर्थन फिर्ता लिने निर्णय गरेको अध्यक्ष यादवले बताए । अब प्रतिपक्षको भूमिका निर्वाह गर्ने उनले बताए ।
