राजपा सरकारमा जाने, महतो सहित को को हुँदैछ मन्त्री
सत्तारुढ दल नेपाल कम्युनिष्ट पार्टी(नेकपा) सँग दुई बुँदे सहमति गरेको राष्ट्रिय जनता पार्टी (राजपा) नेपालले संघीय सरकारमा सहभागी हुने संकेत गरेको छ । केही दिनअघि सरकारको प्रवक्ता समेत रहेका सञ्चार तथा सूचना प्रविधिमन्त्री गोकुल बाँस्कोटाले पनि राजपा सरकारमा आउने खुलासा गरेका थिए ।
सत्तासाझेदार दल समाजवादी पार्टी सरकारबाट बाहिरिने र प्रतिपक्षी दलका रुपमा रहेको राजपा नेपाल सरकारमा सहभागी हुने चर्चा चदिलरहँदा राजपाका अध्यक्ष मण्डलका संयोजक राजेन्द्र महतोले नेकपा र राजपा नेपालबीच हालै भएको २ बुँदे सहमतिपछि सरकारसँगको सहकार्यका थप ढोकाहरू खुल्दै जाने विश्वास व्यक्त गरेपछि राजपा सरकारमा सहभागी हुने सम्भावना बलियो हुँदै गएको बताइन्छ ।
सहमतिलाई लिएर संघीय सरकारमा आफूहरूको सहभागिता र प्रदेश २ सरकारमा असर पर्ने भनेर गरिएको अड्कलबाजीमा कुनै सत्यता नभएको उनले स्पष्ट पारेका छन् ।
हिजो(शनिबार) रिपोर्टर्स क्लब नेपालले आयोजना गरेको साक्षात्कारमा बोल्दै संयोजक महतोले नेकपा र राजपाबीचको दुई बुँदे सहमतिले प्रदेश नम्बर २ को राष्ट्रियसभाको निर्वाचनमा दुवै पार्टीको २–२ सिट सुरक्षित र दुई पार्टीबीच संवाद जारी राख्ने बताए ।
उनले पछिल्लो २ बुँदे सहमतिले नेकपासँगको आफ्नो पार्टीको ‘डेडलक’ अर्थात संवादहीनताको अवस्थाको भने अन्त्य गरेको स्पष्ट पारेका छन् । उनले भने– ‘हामीले सरकारबाट समर्थन फिर्ता लिएपछि डेडलकको अवस्था थियो । यो २ बुँदे सहमतिले संवादहीनताको अन्त्य र तोड्ने काम गरेको छ ।’
कार्यक्रममा महतोले आफ्ना मागप्रति सरकाले लचकता देखाउनुपर्ने बताए । राजपाले उठाएको संविधान संशोधनको माग, नेता तथा कार्यकर्ताहरूमाथि लगाइएका झूठा मुद्दा फिर्ताको माग, रेशम चौधरीको रिहाइलगायतका माग रहेको सकारात्मक भए आफूहरु पनि सकारात्मक हुने बताए ।
यस्तै उनले एक फरक प्रसंगमा राजपा र समाजवादी पार्टीबीचको एकताको ढोका खुल्लै रहेको पनि स्पष्ट पारे ।
कार्यक्रममा महतोले नेपाल–भारतबीचको सीमा विवाद कूटनीतिक माध्यमबाट हल गरिनुपर्नेमा जोड दिए । उनले भने– ‘दूतावासमा पुत्ला दहन गरेर समस्याको समाधान हुँदैन, यो समस्या समाधान गर्ने दायित्व सरकारभित्र पर्छ ।’
महतोले पार्टीको महाधिवेशनको लागि आफूहरू तयारीमा जुटेको पनि स्पष्ट पारे । उनले भने – ‘साधारण प्रक्रियामा जाने कि विशेष महाधिवेशन गर्ने यी दुवै विषयमा हामी खुल्ला छौं । यी दुईमध्ये कुनै पनि महाधिवेशन गर्छौं, यसमा कुनै समस्या छैन ।’
