पुनरावेदन रिटमाथि उच्च अदालतमा पूर्व सभामुख महराको सुनुवाई हुँदै
बलात्कार आरोपमा कारागारमा रहेका पूर्व सभामुख कृष्णबहादुर महराको पुनरावेदन रिटमाथि उच्च अदालत पाटनमा आज सुनुवाई हुँदैछ ।
जिल्ला अदालत काठमाडौंको आदेश खारेजीको माग राख्दै महराले पुनरावेदन रिट हालेका थिए । महराको पुनरावेदनपछि उच्च अदालतले अनुसन्धानदेखि थुनामा राख्न दिइएको आदेशको विवरण माग गरेको थियो ।
जिल्ला अदालतबाट विवरण प्राप्त भएपछि मुख्य न्यायाधीश नहकुल सुवेदी र न्यायाधीश टेकनारायण कुँवरको इजलासले महराको पुनरावेदनको सुनुवाई गर्दैछ ।
जिल्ला अदालत काठमाडौंले प्राप्त अनुसन्धान प्रतिवेदनका आधारमा पुर्पक्षका लागि थुनामा राख्न आदेश दिएको थियो । महरालाई संसद सचिवालयकै महिला कर्मचारी रोशनी शाहीमाथि बलात्कार प्रयासको आरोपमा थुनामा राखिएको छ ।
१२ असोज राति महराले शाहीलाई बलात्कार प्रयास गरेको आरोप लागेपछि १४ असोजमा सभामुखबाट राजीनामा दिएका थिए । तर, महराले भने आफूमाथि लागेको आरोप झूटो भएको दावी गर्दै आएका छन् ।
