राष्ट्रिय सभा निर्वाचनको कार्यतालिका सार्वजनिक
आगामी माघ ९ गतेका लागि तय गरिएको राष्ट्रिय सभा सदस्यको निर्वाचन तालिका सार्वजनिक भएको छ । निर्वाचन आयोगले आज बुधबार राष्ट्रिय सभाका सदस्यको निर्वाचन तालिका सार्वजनिक गरेको हो । आयोगले राष्ट्रिय सभा सदस्य निर्वाचन ऐन, २०७५ को दफा ६ अनुसार निर्वाचन कार्यतालिका सार्वजनिक गरेको हो ।
राष्ट्रिय सभाका ५९ सांसदमध्ये पहिलो कार्यकालका लागि गोलाप्रथाद्वारा १९ सांसदको दुई वर्ष कार्यकाल निर्धारण गरिएको थियो । उनीहरूको कार्यकाल फागुन २० गते सकिन लागेकोले सोही रिक्त पदका लागि माघ ९ गते निर्वाचन हुन लागेको हो ।
उनीहरूको पदावधि सकिनुभन्दा ३५ दिन अगावै निर्वाचन गर्नुपर्ने संवैधानिक व्यवस्था रहेकोले माघ ९ का लागि निर्वाचन तय गरिएको हो । फागुन २० मा दुईवर्षे पदावधि समाप्त हुने सांसदहरूमा मन्त्रिपरिषदको सिफारिसमा राष्ट्रपतिद्वारा मनोनीत अर्थमन्त्री डा. युवराज खतिवडासहित कांग्रेसका ७, नेकपाका ८, राजपाका २, समाजवादीका १ गरी १९ जना रहेका छन् ।
अब उनीहरूको रिक्त स्थानमा हुन लागेको निर्वाचनमा विजयी हुने सांसदको पदावधि भने ६ वर्षको हुनेछ ।
