कांग्रेस मुख्यालय सानेपामा नेविसंघका कार्यकर्ताको अनशन
प्रमुख प्रतिपक्षी दल नेपाली कांग्रेसको भातृ संस्था नेपाल विद्यार्थी संघका कार्यकर्ताहरुले कांग्रेस मुख्यालय सानेपामा रिले अनशन शुरु गरेका छन् ।
कांग्रेस भित्र नेता कृष्णप्रसाद सिटौलाले नेतृत्व गरेको तेस्रो धारका निकट विद्यार्थी नेतहरुको चहलपहल रहेको उक्त अनशनको नेतृत्व रुपा पोखरेलले गरेकी छन् ।
नेपाली कांग्रेसको केन्द्रीय समितिको बैठक बस्ने समय अगावै रुपा पोखरेल लगाएतका आधा दर्जन कार्यकर्ताहरुले अनशन शुर गरेका हुन् । कांग्रेस भित्र संस्थापन पक्ष र पौडेल पक्षले सहमतीमा नेविसंघको नेतृत्वमा ३२ वर्ष कटेका व्यक्तिलाई ल्याउने तयारी भएको आशंका गर्दै सिटौला पक्ष विद्यार्थीहरुले अनशन शुरु गरेका हुन् । सिटौला पक्ष यसअघि देखिनै विधान अनुरुप ३२ वर्ष तलका विद्यार्थी नेतालाई नेविसंघको नेतृत्वमा लैजानु पर्ने आवाज उठाउँदै आएका छन् ।
अनशनरत विद्यार्थीहरुले नेपाल विद्यार्थी संघको विधान २०१७ को (७ औं संशोधन) दफा ५ को उपदफा ५ बमोजिम नेविसंघको नेतृत्वमा ३२ वर्ष मुनीका व्यक्ति ल्याउनु पर्ने माग अघि सारेका छन् ।
अनशनरत विद्यार्थीहरुलाई नेविसंघका तत्कालिन महामन्त्री कुन्दनराज काफ्ले अविर र माला लगाएर स्वागत गरेका थिए । समयमा महाधिवेशन गर्न नसकेर थपिएको म्याद गुजारेपछि अध्यक्ष नैनसिंह महराले राजीनामा दिएका थिए । मातृ संस्था नेपाली कांग्रेसले समयमै व्यवस्थापन नगरिदिँदा १० महिनादेखि नेविसंघ नेतृविहीन अवस्थाबाट गुज्रिएको छ ।
