सरकारका बिषयमा उठेका प्रश्नको जवाफ सुवास नेम्वाङले दिने
नेकपा स्थायी कमिटीमा सरकारका बिषयमा उठेका प्रश्नको जवाफ संसदीय दलका उपनेता सुवास नेम्वाङले दिने भएका छन् । प्रधानमन्त्री केपी शर्मा ओली बैठकमा उपस्थित हुन नसक्ने भएपछि सरकार र संसदका बिषयमा उठेका प्रश्नको जवाफ नेम्वाङले दिने उनी निकट स्रोतले बताएको छ ।
स्थायी कमिटी बैठकमा दुई अध्यक्षले पेश गरेको राजनीतिक प्रतिवेदनमा अध्यक्ष पुष्पकमल दाहाल प्रचण्डले जवाफ दिने छन् । पार्टी र राजनीतिक प्रतिवेदनमाथी उठेका प्रश्नको जवाफ दाहालले दिएपनि सरकारका बिषयमा भने नेम्वाङले जवाफ दिने भएका छन् ।
‘उहाँ आज पूर्वजाने कार्यक्रम थियो तर प्रधानमन्त्री ओलीले बैठकको अन्तिममा बोल्न आग्रह गरेपछि पूर्व जाने कार्यक्रम स्थगित भएको छ’ उनी निकट स्रोतले भन्यो । प्रधानमन्त्रीका तर्फबाट उनले बोल्ने भएका छन् । सरकारमा नभएपनि सरकारका काम कारवाहीका बिषयमा उनले स्थायी कमिटीका सदस्यहरुलाई जानकारी गराउनेछन् ।
स्वास्थ्य अबस्थाका कारण प्रधानमन्त्री ओली बालुवाटारमै आराम गरिरहेका छन् । स्थायी कमिटीमा सरकारको आलोचना भएपछि प्रधानमन्त्री ओलीले आफु निकटका नेताहरुलाई अन्तिममा बोल्न आग्रह गरेका छन् । सरकारका बिषयमा केही नेम्वाङले जवाफ दिनेछन् भने केही उपप्रधानमन्त्री इश्वर पोखरेलले जवाफ दिनेछन् ।
