बामदेवलाई रोक्ने, केपीलाई ठोक्ने यस्तो छ नेपाल पक्षको तयारी, प्रचण्डलाई हाईसन्चो
सत्तारुढ दल नेपाल कम्युनिष्ट पार्टी(नेकपा)को स्थायी समितिको बैठकमा महासचिव विष्णु पौडेलद्धारा प्रस्तुत विधान संसोधनमा बरिष्ठ नेता माधवकुमार नेपाल पक्षले सशक्त विरोध जनाउने संकेत दिएका छन् ।
खासगरी तत्कालीन नेकपा एमालेको उपाध्यक्ष रहेका वामदेव गौतमलाई नेकपाको उपाध्यक्षतमा लैजानेगरी गरिएको विधान संसोधनको प्रस्तावमाथि भित्रभित्रै असन्तुष्टि रहेको नेपाल पक्षले बिरोध गर्ने एक नेताले बताए । ती नेताका अनुसार गौतमसँगै तत्कालीन एमालेमा उपाध्यक्ष रहेको अष्टलक्ष्मी शाक्य, भीम रावल र युवराज ज्ञवालीको हैसियत बराबर दिनुपर्ने माग नेपाल पक्षले गरेको छ । बरिष्ठ नेता नेपालले यसअघि नै सचवालय बैठकमा तत्कालीन एमालेका चारै जना उपाध्यक्षलाई समान हैसियत दिनुपर्ने भन्दै माग उठाउँदै आएका छन् ।
तर सचिवालयले नेता नेपालको मागलाई सम्बोधन नगरी त्यसलाई वेवास्ता गर्दै गौतमलाई उपाध्यक्ष बनाउनका लागि विधान संसोधन गर्ने निर्णय गरेको थियो । नेपाल पक्षका एक प्रभावशाली नेताले पार्टीमा कसैलाई काखा र कसैलाई पाखा हुन नहुने र यसो भएमा आफूहरु चुप लागेर नबस्ने बताए । उनले भने–‘हामी अन्यायका बिरुद्ध जमेर कुरा राख्छौ । ’
त्यस्तै नेपालपक्षले पार्टी अध्यक्ष समेत रहेका प्रधानमन्त्री केपी शर्मा ओली विरुद्ध पनि जमेर प्रस्तुत हुने तयारी गरेको बताईएको छ । एक नेताका अनुसार नेपाल पक्षले सरकारको कार्यशैली र सरकारी नियुक्तिलाई लिएर बिरोध गर्ने सूची नै बनाएको छ । तर अध्यक्ष प्रचण्डको सन्दर्भमा भने नरम नीति अख्तियार गर्ने जनाईएको छ । अध्यक्ष प्रचण्डका विषयमा नेपाल पक्षले पर्ख र हेरको नीति लिएको ती नेता बताउँछन् ।
उता सचिवालयले गरेको निर्णयलाई स्थायी समतिले अनुमोदन गरेपनि विधान संसोधनका बिषयमा निर्वाचन आयोगका कारण केन्द्रीय समितिले नै निर्णय गर्नुपर्ने अवस्था आएको छ । पार्टी एकतापछि बनेको नेकपाको विधान केन्द्रीय समितिबाट पारित भएको र आयोगमा बुझाउदा पनि केन्द्रीय समितिको निर्णय आवश्यक रहेको बताईएको छ । यस्तो अवस्थाले गर्दा गौतम तत्कालै उपाध्यक्ष हुने संभावना कमजोर हुँदै गएको छ ।
स्थायी समितिमा सहमति भए पनि गौतम उपाध्यक्ष बन्नका लागि केन्द्रीय समितिको बैठक कुर्नुपर्ने भएको छ । जारी स्थायी समितिको बैठकमा अध्यक्ष पुष्पकमल दाहाल(प्रचण्ड)द्धारा प्रस्तावित राजनीतिक प्रतिवेदनमा केन्द्रीय समितिको बैठक आगामी माघको पहिलो साता बस्न प्रस्ताव गरिएको छ ।
