अध्यक्ष प्रचण्डले गरे आत्म आलोचना, यस्तो छ राजनीतिक प्रतिवेदन
नेपाल कम्युनिष्ट पार्टी (नेकपा) स्थायी किमिटीको वैठकमा पार्टी अध्यक्ष पुष्पकमल दाहाल (प्रचण्ड) ले राजनीतिक प्रतिवेदन पेश गरेका छन् । प्रचण्डले वैठकमा आफूले तयार पारेको राजीनितक प्रतिवदेन पेश गरेका हुन् ।
वैठकमा प्रस्तुत प्रतिवेदनमा वर्तमान राजनीतिक परिस्थिति, राजनीतिक घटनाक्रम, पार्टीको आगामी नीतिलगायत विषयहरु समावेश छन् । पार्टी एकतापछि दोस्रो पटक स्थायी कमिटी वैठक बसेको हो । वैठकमा १६ पृष्ठ लामो प्रतिवेदन पेश गरेका प्रचण्डले समयमा पार्टीका वैठकहरु आयोजना गर्न नसकेकोमा आत्मआलोचना गर्दै अब नियमित रुपमा वैठकहरु बस्ने प्रतिबद्धता पनि जनाएका छन् ।
बैठकको सुरुमा अध्यक्ष प्रचण्डले अध्यक्षद्वयका तर्फबाट राजनीतिक प्रतिवेदन, विधान संशोधन, नेपाल भारत सीमा समस्या, केन्द्रीय कमिटी बैठक र विविध विषयमा छलफल हुने कार्यसूची प्रस्तुत गरेका थिए ।
प्रचण्डले पेश गरेको राजनीतिक प्रतिवेदनमा मुख्य ७ विषयलाई जोड दिइएको छ । प्रतिवेदनमा राष्ट्रिय परिस्थिति, अन्तर्राष्ट्रिय परिस्थिति, पार्टी एकतापछि पार्टी सुदृढीकरण अभियान, सरकारको कामको समिक्षा र उपचुनावको समिक्षा लगायतका विषय उल्लेख गरिएको छ ।
प्रचण्डले १६ पृष्ठ लामो प्रतिवेदनमा आगामी कार्ययोजना सम्बन्धि कार्यक्रमसमेत रहेको प्रवक्ता नारायणकजी श्रेष्ठले जानकारी दिए ।
विधान अनुसार प्रत्येक ३–३ महिनामा बस्ने स्थायी कमिटीको वैठक यस अघि गर्त वर्ष २९ माघ मा बसेको थियो । त्यसयता स्थायी कमिटीका सदस्यहरुले वैठकको माग गर्दै आए पनि वैठक हुन सकेको थिएन ।
आज पार्टी मुख्यालय धुम्बाराहीमा प्रचण्डको अध्यक्षतामा बसेको स्थायी कमिटीको बैठक दुई घण्टा चलेर स्थगित भएको छ । वैठक भोली (सोमबार) ११ बजे फेरि बस्ने जानकारी दिए । बैठकमा पार्टी अध्यक्ष समेत रहेका प्रधानमन्त्री केपी शर्मा ओलीको उपस्थित भने थिएन ।
आज बिहान प्रधानमन्त्रीको सरकारी निवास बालुवाटारमा पार्टी अध्यक्ष समेत रहेका प्रधानमन्त्री ओलीको उपस्थितिमा बसेको सचिवालय बैठकले स्थायी कमिटीको बैठकमा प्रस्तुत गर्ने पाँच एजेण्डा तय गरेको थियो ।
सचिवालय वैठकले प्रचण्डले प्रस्तुत गर्ने राजनीतिक प्रतिवेदन, केन्द्रीय कमिटी बैठक बोलाउने, नेपाल(भारत सीमा विवाद, विधान संशोधन र विविध एजेन्डा तय गरेको थियो ।
