पुराना पार्टी हतियारबिनाका फौजी हुन्
नेपाली राजनीतिमा अलि बढी आशा गरिएका, वैचारिक एवं भिन्नमत राख्न सक्ने नेताका रुपमा चिनिन्छन्, पर्यटन मन्त्री योगेश भट्टराई र कांग्रेस नेता गगन थापा । अर्कातिर सञ्चार कर्म छोडेर राजनीतिमा होमिएका रवीन्द्र मिश्रले पनि पुराना राजनीतिक दलले नेपालको निकास दिन नसक्ने बताउँदै साझा पार्टीको राजनीति गरिरहेका छन् ।
यी तीनैजना व्यक्तित्व नेपाली राजनीतिमा अबको नेतृत्व कस्तो ? भन्ने बहसमा जुटे । नेपाल लिटरेचर फेस्टिभलको तेस्रो दिन पोखराको रमणीय फेवा किनारमा यी तीन नेतासँग पत्रकार उमेश चौहानले बहस चलाए ।
कांग्रेस नेता गगन र नेकपा नेतासमेत रहेका योगेशले राजनीतिमा चमत्कार गर्न सम्भव नभए पनि कार्यशैली र कामबाट भिन्न हुने प्रयास गरेको बताए । शासकीय पदमा पुग्दैमा सबै कुरा परिवर्तन गर्न सक्ने प्रणाली अहिले नरहेको तर भिन्न हुने प्रयत्न भने भइरहेकोमा दुबैजना सहमत छन् ।
वैकल्पिक राजनीतिको वकालत गरिरहेको साझा पार्टीका संयोजक रवीन्द्र मिश्र अपवादबाहेक पुराना पार्टीका सबै नेताहरुको कार्यशैलीमा समस्या रहेको बताउँछन् । मिश्र भन्छन्, ‘पुरानो राजनीतिक दल हतियारबिनाका फौजी हुन् ।’
पुराना पार्टीले गलत बाटो हिँडिरहेको मिश्रले बताएपछि मन्त्री योगेशले कडा जवाफ दिए । उनले नेपाल कम्युनिस्ट पार्टी र कांग्रेसजस्ता पार्टीले राजनीतिक डोजर लगाएर मैदान नबनाएको भए रवीन्द्र मिश्रहरु बीबीसीमा समाचार पढिरहेकै हुने भन्दै कटाक्ष गरे ।
‘नेपाल कम्युनिस्ट पार्टी, नेपाली कांग्रेसजस्ता राजनीतिक दलले चलाएको डोजरबाट मैदान सम्याउन नसकेको भए, लोकतन्त्रको नयाँ मैदान बनाउन नसकेको भए गगन थापा र म रत्नपार्कमा मसाल जुलुस गरिरहेका हुन्थ्यौं र रवीन्द्र मिश्रजीले बीबीसीमा हाम्रो समाचार पढिराखेको हुनुहुन्थ्यो,’ योगेशले भने, ‘आज हामीले चलाएको राजनीतिको हतियारबाट बनिएको मैदानमा हाम्रो हतियारमा खिया लागेको छ भन्न पाउनुहुन्छ ।’
आवाज नसुनिने, प्रश्न नगर्ने निर्जिव बन्दै गएको समाजमा राजनीतिक चेतनाको आफैं छाल निर्माण गर्ने या अरुले नै निर्माण गरेको छाल गनेर बस्ने ? फेवाको छालसँग राजनीतिलाई जोड्दै उमेश चौहानले बहसमा प्रश्नको उठान गरेका थिए ।
जसरी प्रश्न सोधिनुपथ्र्यो, जसरी आवाज उठाउनुपथ्र्यो, त्यसरी नउठेको भए पनि समाज त्यति निर्जिव भइनसकेको कांग्रेस नेता गगनको भनाइ थियो । ‘प्रत्येक दिन लाखौं मानिसले सामाजिक सञ्जालमा प्रश्न गर्छन् । आवाज र कोलाहलबीचको भिन्नतामा हामी कतै मिसिँदै गयौं होला पनि,’ गगनले भने, ‘भर्खर हामीले जुन परिवर्तन गरेर यहाँसम्म आएका छौं, त्यहाँ हाम्रो भूमिका थियो कि थिएन ? हस्तक्षेप गरेर आएका हौं कि होइनौं ?’
तर, जति साहस गर्नुपर्ने हो, त्यति गर्न चुकिरहेको, हस्तक्षेप र प्रश्न गर्न डरायौं कि भन्ने आफूलाई पनि लागिरहेको गगनले स्वीकार गरे ।
अहिलेको पार्टी र सरकारको काम एजेन्डामा जोड्न किन नसक्नुका कारणबारे नेकपा नेता तथा पर्यटनमन्त्री भट्टराईले खुलाए । हल्ला, कोलाहल सिर्जना हुनु नेपाली समाजमा देखिएका समष्टिगत प्रवृत्तिका रुपमा देखिएको भट्टराईको भनाइ थियो । लोकतन्त्रले कुनै पनि छाललाई सही बाटो दिने उनले बताए ।
पत्रकार चौहानले पूर्वराजा ज्ञानेन्द्र शाहको गतिविधिले राजनीतिक दलमा एकखालको हल्ला र डर सिर्जना भएकोप्रति इंगित गरेका थिए । त्यसको जवाफ दिँदै भट्टराई भने पूर्वशासक ज्ञानेन्द्र जुन गतिविधि बाहिर देखिएको भए पनि त्यो आपत्तिजनक नरहेकाले डराउनुपर्ने अवस्था नरहेको बताए ।
‘पूर्वराजाको गतिविधि त्यति आपत्तिजनक कुरा होइन । पूर्वराजाकै कारण खतरामा पर्ने लोकतन्त्र र गणतन्त्र हामीले ल्याएका होइनौं,’ भट्टराईले भने, ‘लोकतन्त्रको जग बलियो छ । सवाल त्यसलाई सहीरुपमा देखाउनुपर्ने छ ।’
जनताका आकांक्षा र प्रश्नले नेतृत्व हतोत्साही हुनुपर्ने अवस्था नरहेको भट्टराईले बताए । अहिले नेपालमा ठूलो हिस्सा युवाले ओगटेको र युवाले अवसर नपाउँदा एकखालको छटपटी देखिएको उनको भनाइ थियो ।
