कसरी बन्दैछ गौतमबुद्ध रङ्गशाला

 

रामपुरमा निर्माण थालिएको गौतमबुद्ध अन्तर्राष्ट्रिय क्रिकेट रङ्गशाला हेर्न आउनेको घुइँचो लाग्न थालेको छ । सोमबार मात्र २० रुपैंयाँको टिकट काटेर दुई हजार ५०० ले निर्माणाधीन रङ्गशाला अवलोकन गरेका छन् ।

 

विभिन्न जिल्लाबाट भ्रमणका लागि आएका र यस जिल्ला हुँदै अन्यत्र जिल्ला जाने विद्यालयका विद्यार्थीदेखि सहकारी, आमा समूह, टोल विकास समितिलगायतका सङ्घसंस्थाका भ्रमण टोलीको प्रमुख गन्तव्य रङ्गशाला बन्ने गरेको छ ।

धुर्मुस–सुन्तली फाउण्डेशनका अध्यक्ष सीतारम कट्टेलले सोमबार भ्रमण गर्न आएको एक समूहले रङ्गशाला निर्माणका लागि ६० हजार रुपैंयाँ सहयोग समेत गरेको बताएका छन् ।

राष्ट्रिय र अन्तर्राष्ट्रियस्तरमा चासोका रूपमा रहेको रङ्गशाला कसरी बन्दैछ, धेरैलाई चासो भएकाले प्रवेश शुल्क राखेर देखाउन थालिएको हो । १० दिनअघिदेखि प्रवेशको व्यवस्था मिलाइएपछि दैनिक रङ्गशाला हेर्न आउनेको संख्या बढ्दै गएको कट्टेलले बताए । कैलाली, कञ्चनपुर, अर्घखाँची, झापा, दाङ, बागलुङलगायतका जिल्लाबाट रङ्गशाला हेर्ने आएका उनले जानकारी दिए ।

निर्माण हुँदै गरेको रङ्गशालाको अवलोकन र तस्वीर खिच्नेको भीड लागेको छ । अहिले रङ्गशालाको निर्माणको काम तीव्रगतिमा अघि बढेको छ । भुइँमा माटो भर्ने काम सम्पन्न गरी रोलरले पेल्ने काम समेत भइसकेको छ ।

पाँगो माटो व्यवस्थापन गर्ने काम भइरहेको भन्दै उनले मैदानको कालोपत्रका लागि ढुङ्गा बिछ्याउने काम भइरहेको जानकारी दिए । एक फिट मोटो ढलान गर्नुपर्ने भएकाले १४१ कामदार खटिएको उनले बताए ।

रङ्गशालामा नमूना खेल मैदान निर्माण गरी दुई मैत्रीपूर्ण खेल समेत सम्पन्न भएका छन् । रङ्गशला सम्पन्न हुँदै गर्दा सो ठाउँ पार्किङ हुनेछ । रङ्गशालामा देशका ७७ जिल्लाको अपनत्व हुने गरी नक्साङ्कन गरिएको छ । रङ्गशालाका विभिन्न कक्षलाई जिल्लाबाट नामाकरण गरिएको उनले जानकारी दिए ।

निर्माणको काम तीव्र भए पनि आर्थिक संकलन भने खासै हुनसकेको छैन । आठ करोड हाराहारी बोलकबुल भएकामा एक करोड मात्र सङ्कलन भएको भन्दै कट्टेलले हालसम्म विभिन्न क्षेत्रबाट बोलकबुल बाहेक तीन करोड सङ्कलन भएको बताऐ । रङ्गशाला सम्पन्न गर्न दुई अर्ब ५० करोड खर्च हुने अनुमान छ ।

यद्यपि श्रमदान र अन्य सामग्रीको सहयोग भएमा त्यति खर्च नलाग्ने उनले जानकारी दिए । हाँस्य कलाकारितालाई केहि समय थाँती राखेर रङ्गशाला निर्माणमा जुटेका सीताराम कट्टेलको हरेक समय अहिले यहिं बितिरहेको छ । उनी विहानदेखि बेलुकैसम्म कामदारहरुसँग खट्छन् ।

कामको अनुगमन गर्ने, सहयोग रकम जुटाउने र कामदारलाई रङ्गशाला निर्माणमा दतचित्त भएर खट्नका लागि उनी प्रेरित गरिरहन्छन् । विहान ६ बजेबाटै शुरु हुने रङ्गशाला निर्माणको काम साँझ आँखा देख्दासम्म चल्छ ।

कोही बालुवा बोक्ने, कोही सिमेन्ट मुछ्ने, कोही गाडीबाट सामान ओसार्ने, झार्ने, कोही रोलरले माटो पेल्ने गरेको दृष्य देख्दा सबैलाई यहाँ भइरहेको मेहनतले उर्जा दिने गरेको स्थानीय बताउँछन् ।

यहाँ भइरहेको काममा विदेशी शैलीको झल्को मिल्ने भ्रमणमा आएकाहरुको प्रतिक्रिया रहने गरेको छ । धुर्मुस–सुन्तली फाउण्डेशनका अध्यक्ष सीताराम कट्टेल भन्छन्, ‘रङ्गशाला निर्माणमा आफ्नो कुनै निजी स्वार्थ छैन, राष्ट्रका लागि केहि गर्न सकिन्छ कि भनेर सुखलाई छाडेर दुःख गर्दैछु ।’