यस्तो छ प्रचण्डको ६ महिने कार्ययोजना, स्थायी र केन्द्रीय समिति डाक्ने तयारी
गत बुधवार बसेको नेकपा सचिवालय बैठकले पुष्पकमल दाहाल प्रचण्डलाई कार्यकारी अध्यक्षको जिम्मेवारी दिएपछि पहिलो सचिवालय बैठक बोलाउने तयारी गरेका छन् । प्रचण्डले यसै साता आफ्नो अध्यक्षतामा पहिलो बैठक बसाल्ने तयारी थालेको उनी निकट एक नेताले बताए ।
नेकपा एकता पछि पार्टी ठुलो भएपनि नेता कार्यकर्ता निस्क्रिय छन् । पार्टीका क्रियासिल नेताहरु यतिबेला फुर्सदिला बनेका छन् । उनीहरुलाई क्रियासिल बनाउन र पार्टीमा ‘भाइब्रेसन’ ल्याउन ६ महिने कार्ययोजनाको तयारी पनि प्रचण्डले थालेका छन् । ६ महिने कार्ययोजनासहित बैठक बोलाउन लागेको स्रोतले बताएको छ ।
आफ्नो अध्यक्षतामा बैठक बसाल्ने र पहिलो ६ महिने कार्ययोजना ल्याउन प्रचण्डले अर्का अध्यक्ष तथा प्रधानमन्त्री केपी शर्मा ओलीसँग छलफल गरेका छन् भने पार्टी सचिवालयका नेताहरुसँग पनि परामर्समा छन् । पार्टीलाई क्रियासिल बनाउन कार्ययोजना ल्याउने तयारी गरेका प्रचण्डले आफु निकटका नेताहरुलाई सक्रिय बनाएका छन् । नेता जनार्दन शर्मा र बर्षमान पुनले अध्यक्षको ६ महिने कार्ययोजनामा छलफल गरिरहेको स्रोतले बताएको छ ।
उनको अध्यक्षतामा बैठक बस्छ की बस्दैन, त्यो भने अहिलेसम्म एकिन भइसकेको छैन । तर यसैसाता पार्टी सचिवालय बैठक बोलाउने तयारी भइरहेको प्रवक्ता नारायणकाजी श्रेष्ठले बताए । ‘मिति तय भएको छैन, तर ६ महिने पार्टीको कार्ययोजनासहित बैठक बस्दैछ’ उनले भने ।
कार्यकारी अध्यक्षको जिम्मेवारी पाएपछि प्रचण्ड सक्रिय बनेका छन् । जिम्मेवारी पाएका दिन निकै हर्षित भएका प्रचण्ड आफ्नो क्षमता प्रर्दशनको तयारीमा छन् । तर बैठक बोलाउने र कार्ययोजनामा छलफल गर्ने गरी दुई अध्यक्षबीच सहमति भए नभएको भने निक्र्यौल भइसकेको छैन ।
प्रचण्डले बैठकका लागि प्रधानमन्त्री ओली, वरिष्ठ नेताद्धय झलनाथ खनाल, माधव नेपाल, नेता बामदेव गौतम र महासचिव बिष्णु पौडेलसँग छलफल गरिसकेका छन् । सचिवालय बैठकपछि स्थायी कमिटी र केन्द्रीय समितिको बैठक बोलाउने तयारी पनि प्रचण्डले थालेका छन् ।
