नेविसंघको नारा केपी ओलीको राष्ट्रवाद हेरियो, राष्ट्रकै नक्सा फेरियो
प्रधानमन्त्री केपी शर्मा ओलीको आलोचना गर्दै नेपाली कांग्रेस निकट नेवि संघले भारतीय बिस्तारवादको विरोध गरेको छ । सीमा अतिक्रमणको विरोधमा नेपाल विद्यार्थी संघले काठमाडौमा प्रदर्शन गरेको हो । पशुपति क्याम्पस चावहिलबाट सुरु भएको विरोध प्रदर्शन चावहिल चोक, गौशालासहित विभिन्न ठाउँको परिक्रमापछि कोणसभामा परिणत भएको हो । विद्यार्थीहरुले प्रधानमन्त्री ओलीले राजीनामा दिनुपर्ने पनि माग गरेका छन ।
सहभागीहरूले ‘सरकार कता हरायो ? राष्ट्रियता जोगाउन किन डरायो ?’, ‘केपी ओलीको राष्ट्रवाद हेरियो, राष्ट्रकै नक्सा फेरियो’, ‘साथ दिन प्रतिपक्षी यहाँ छ, प्रधानमन्त्री ज्यू हाम्रो कालापानी कहाँ छ ?’ लगायतका नारा भएका प्लेकार्ड, ब्यानर र राष्ट्रिय झण्डा बोकेर प्रदर्शनमा निस्केका थिए ।
प्रदर्शनका सहभागीहरुले भारतले नक्सा सच्याउनुपर्ने माग राखेका छन् । विद्यार्थीहरुले लामो समय देखि भारतले सार्वजनिक गरेको नयाँ राजनीतिक नक्सामा कालापानी, लिम्पियाधुरा र लिपुलेकलाई भारतीय सीमाभित्र पारेको भन्दै त्यसको चर्को विरोध गर्दै आएका छन् ।
