बागी उम्मेदवार लिन घरकै छतमा हेलिकप्टर
बागलुङमा वाम उम्मेदवारविरुद्ध बागी बनेका शेरमान घर्ती मगरको उम्मेदवारी फिर्ता लिने प्रयास विफल भएको छ । पार्टी महासचिव विष्णु पौडेलसँगको छलफलपछि उनी उम्मेदवारीबाट पछि हटेका थिए ।
उम्मेदवारी फिर्ता लिने समय आइतबार दिउँसो १ बजेसम्म तोकिएको थियो । घर्ती भने सदरमुकामबाट १०० किलोमिटर टाढा ढोरपाटन नगरपालिका पुगेका थिए । उनलाई लिन मेयर देवकुमार नेपालीले हेलिकप्टर चार्टर्ड गरेका थिए । हेलिकप्टर मेयर नेपालीकै होटलको छतमा बसेको थियो । उम्मेदवारी फिर्ता लिने समय १५ मिनेट बाँकी हुँदा मात्र उनी बुर्तिबाङबाट हिँडेका थिए । समय गुज्रिएपछि मात्र उनी मुख्य निर्वाचन अधिकृतको कार्यालय पुगे ।
प्रदेशसभा सदस्यअन्तर्गत बागलुङ क्षेत्र नम्बर २ (२) को उपनिर्वाचनमा नेकपाले राष्ट्रिय जनमोर्चाका उम्मेदवारलाई समर्थन गरेको छ । जनमोर्चाका खिमविक्रम शाहीले साझा उम्मेदवारका रुपमा मनोनयनपत्र दर्ता गराएका थिए । नेकपा नेता घर्तीले पार्टी केन्द्रको निर्णयलाई चुनौती दिँदै उम्मेदवारी दिएका थिए ।
