म्यान्मा र जापानको भ्रमण सम्पन्न गरी आज स्वदेश फर्कंदै राष्ट्रपति
म्यान्मा र जापानको भ्रमण सम्पन्न गरी राष्ट्रपति विद्यादेवी भण्डारी आज (६ कात्तिक, बुधबार) स्वदेश फर्कंदै हुनुहुन्छ । जापानी सम्राट् नोरुहितोको गद्दी आरोहण विशेष समारोहमा सहभागी हुन उहाँ गत आइतबार म्यान्माबाट जापान पुग्नुभएको थियो ।
जापानको तीनदिने औपचारिक भ्रमणमा रहँदा राष्ट्रपति भण्डारीको जापानी प्रधानमन्त्री सिन्जो आबे र भारतीय राष्ट्रपति रामनाथ कोविन्दसँग छुट्टाछुट्टै भेटवार्ता भएको थियो । नेपाली प्रतिनिधिमण्डलले टोकियोको करीब एक हजार २०० पुरानो आसाकुसा मन्दिर र स्काइ ट्री टावरको पनि भ्रमण गरेको थियो ।
राष्ट्रपति भण्डारीको स्वागतमा जापानस्थित नेपाली राजदूतावासले रात्रिभोजको आयोजना गरेको थियो । यसअघि गत असोज २९ गतेदेखि राष्ट्रपति भण्डारीले म्यान्माका राष्ट्रपति विन मिन्तको मैत्रीपूर्ण निमन्त्रणामा म्यान्माको पाँचदिने राजकीय भ्रमण गर्नुभएको थियो । राष्ट्रपति भण्डारी हानेदा विमानस्थलबाट चीनको ग्वान्जाओ हुँदै आज स्वदेश फर्कन लाग्नुभएको हो ।
