प्रधानमन्त्री ओली र प्रचण्डबीच खटपट !
नेकपाका दुई अध्यक्षबीच खटपटको अवस्था देखिएको छ । प्रधानमन्त्री केपी शर्मा ओली र पूर्वप्रधानमन्त्री पुष्पकमल दाहाल ‘प्रचण्ड’का विवादास्पद अभिव्यक्तिले यसको संकेत गर्छ ।
चण्डले केही दिनअघि पार्टीमा अराजकता बढेको संकेत गर्दै भनेका थिए, ‘त्यो ग्यास्ट्रिकको अवस्थामा छ । अल्सर भयो भने जटिल हुन्छ । क्यान्सर भयो भने त निकै हुँदैन ।’ उनले पूर्वी युरोपको अवस्था नेपालका कम्युनिस्टमा आउन सक्ने पनि बताएका थिए । क्युनिस्ट नेताले आफूलाई राजा–महाराजाजस्तै ठान्दा जनतासँगको दूरी बढेको उनको भनाइ थियो । उनको आशंका थियो– कतै नेपालका कम्युनिस्ट नेता पनि त्यो बाटोमा त छैनन् ?
उनले केही समययता अधिकांश भाषणमा यस्तै कुरा पटक–पटक उल्लेख गरेका छन् । त्यसमाथि चिनियाँ राष्ट्रपति सी चिनफिङको नेपाल भ्रमणपछि अर्को कुरा उनले थपेका छन् । सीले जे भने त्यसको कमी आफूले महसुस गरेको उनले बताएका छन् । यसको संकेत भनेको पार्टीमा अनुशासन उल्लंघनकै कुरा हो । उनी यसरी किन असन्तुष्टि व्यक्त गरिरहेका छन् ? यसमा ओलीसँगको खटपट नै मुख्य कारक देखिन्छ । ओली विदेश भ्रमणमा रहेका बेला प्रचण्डले ‘भद्र सहमतिको कुरा उठाएका थिए । त्यो प्रकरण त्यत्तिकै सेलाएर गएको थियो । यस बेला आएर पार्टीका दुई अध्यक्षको विवादास्पद भनाइ आउनुले खटपटको संकेत गर्छ ।
ठूला दैनिक पत्रिकाले हालै प्रधानमन्त्री ओलीका विशेष अन्तर्वार्ता छापेका छन् । दुवै अन्तर्वार्तामा उनले प्रचण्डसँग असन्तुष्टि जनाएका छन् । अन्नपूर्ण पोस्ट्ले ‘सोभियत शासनजस्तो टेकोमा छैनौं हामी’ भनेर अन्तर्वार्ता प्रकाशन गरेको छ । कान्तिपुरले ‘मलाई लखेटेर हटाउन सम्भव छैन’ शीर्षकमा अन्तर्वार्ता छापेको थियो ।
