राजकीय भ्रमणका लागि राष्ट्रपति भण्डारी जापान प्रस्थान
राष्ट्रपति विद्यादेवी भण्डारी म्यानमारबाट सीधैं जापान प्रस्थान गरेकी छन् । राजकीय भ्रमणका लागि म्यान्मार गएकी भण्डारी निर्धारित कार्यक्रमअनुसार त्यहाँबाट आइतबार बिहान जापानतर्फ लागेकी हुन् । म्यानमारबाट थाई एयरवेजको विमान चढेकी राष्ट्रपति भण्डारी आइतबार राति जापान पुग्ने राष्ट्रिय समाचार समितिले जनाएको छ ।
राष्ट्रपति भण्डारी जापानी सम्राट नोरुहितोको राज्याभिषेकमा सहभागी हुने कार्यक्रम छ । भ्रमणको दौरानमा उनले भेटघाट तथा अवलोकनसमेत गर्ने बताइएकाे छ । भण्डारी कात्तिक ६ गते स्वदेश फर्कने कार्यक्रम छ ।
राष्ट्रपति विद्यादेवी भण्डारी म्यान्मा गणतन्त्र सङ्घका राष्ट्रपति ऊ विन मिन्तको मैत्रीपूर्ण निमन्त्रणामा गत असोज २९ गते म्यानमार गएकी थिइन् । परराष्ट्रमन्त्री प्रदीपकुमार ज्ञवाली, परराष्ट्र सचिव शङ्करदास वैरागी, राष्ट्रपति कार्यालयका सचिव डा हरि पौडेल, राष्ट्रपतिका प्रमुख स्वकीय सचिव डा भेषराज अधिकारी तथा परराष्ट्र मन्त्रालय र राष्ट्रपति कार्यालयका उच्चपदस्थ अधिकारीसँगै म्यान्मार पुगेकी उनले त्यहाँका राष्ट्रपति मिन्तलगायतसँग भेटवार्ता गरेकी थिइन् । भ्रमणको दौरानमा राष्ट्रपति भण्डारी र स्टेट काउन्सिलर चीको उपस्थितिमा म्यान्मा र नेपालबीच पर्यटन र सांस्कृतिक सहयोगसम्बन्धी समझदारीपत्रमा हस्ताक्षर भएको छ ।
