पुष्पकमल दाहाल प्रचण्डले भने मन्त्रिमण्डल फेर्ने कुरा मलाई नसोधिदिए हुन्थ्यो
नेकपाका अध्यक्ष पुष्पकमल दाहाल ‘प्रचण्ड’ले मन्त्रिपरिषद् हेरफेर बारेको कुरा आफूलाई नसोध्न आग्रह गरेका छन् ।
शुक्रवार (आज) सुदूरपश्चि प्रदेश पत्रकारसँग कुरा गर्दै नेकपाका अध्यक्ष प्रचण्डले मन्त्रिमण्डल पुनर्गठनको कुरा आफूलाई नसोधिदिए हुन्थ्यो भन्ने लाग्ने बताए ।
‘यो कुरा मलाई नसोधिदिए हुन्थ्यो भन्ने लाग्छ । यो प्रधानमन्त्रीको क्षेत्रधिकार भित्रको कुरा हो । उहाँले जे सोच्नु हुन्छ त्यही हुन्छ’ प्रचण्डले भने ।
तपाईं पनि त पार्टी अध्यक्ष हो नि त ! भन्ने पत्रकारको प्रश्नमा प्रचण्डले भने,‘पार्टी अध्यक्ष म पनि हो मसँग प्रधानमन्त्रीले सल्लाह गर्नुहुन्छ । तर अहिले मिडियामा आएको जस्तो यो जाने भयो रे, यो आउने भयो रे भन्ने भएको छैन ।’
मन्त्रिमण्डल हेरफेर गर्ने बारेमा प्रधानमन्त्रीसमेत रहेका पार्टी अध्यक्ष केपी ओली र आफ्नाबीच कुनै चर्चा नभएको प्रचण्डको दाबी थियो ।
‘प्रधानमन्त्री र मेरो कुरा हुँदा यो चर्चा भएको छैन,’ प्रचण्डले भने,‘ हाम्रो बीचमा ठोस रुपमा कुरा भएको छैन । यो विषय प्रधानमन्त्रीको सोचको विषय हुन्छ ।’
केही दिन अघि प्रधानमन्त्री केपी ओली र प्रचण्डको बीचमा भएको भेटवार्तामा प्रधानमन्त्री केपी शर्मा ओलीले मन्त्रिहरुको कामबाट चित्त नबुझेको भन्दै मन्त्रिमण्डल पुनर्गठन गर्ने विषयमा प्रचण्डसँग छलफल गरेका थिए ।
तत्कालै मन्त्रिमण्डल हेरफेर गर्ने भनिएपनि छठ सम्मलाई यो विषय रोकिएको नेकपाका प्रवक्ता नारायणकाजी श्रेष्ठले बताएका थिए ।
‘तिहार र छठपछि मात्र यो विषयमा कुरा हुने भएको छ’ श्रेष्ठले भनेका थिए,‘तत्कालै नगरौं भन्ने कुरामा दुबै अध्यक्ष सहमत हुनु भएको छ ।’
नेकपाले वुधवार आयोजना गरेको चियापान कार्यक्रममा नेकपाका नेता माधव कुमार नेपालले पनि तत्काल मन्त्रिमण्डल पुनर्गठन गर्न नहुने बताएका थिए ।
उपनिर्वाचन नजिकिएको र मन्त्रिमण्डल हेरफेर गर्दा त्यसमा पनि प्रभाव पर्न सक्ने भन्दै नेता नेपालले तत्काल मन्त्रिमण्डल पुनर्गठन उपयुक्त नभएको बताएका थिए ।
